07.11.2024 | 10:30
Նավթի գներն աճել են
Պուտինը գաղափար չունի, ինչ է իրեն սպասվում․ Ջո Բայդենը նոր պատասխան միջոցներ է խոստանում
Քաղաքականություն
02.03.2022 | 11:29
ԱՄՆ նախագահ Ջո Բայդենը նախօրեին ժողովրդին ուղղված իր ուղերձում հայտարարել է,որ ՌԴ նախագահ Վլադիմիր Պուտինն իր հաշվարկներում սխալվել է։ Խոսքը վերաբերում է նրան, թե ինչպես Արևմուտքը կարձագանքի Ուկրաինա ներխուժմանը, գրում է BBC-ի ռուսական ծառայությունը։
Իր խոսքում Բայդենը վստահեցրել է ամերիկացիներին իր «անսասան վճռականության մեջ, որ ազատությունը միշտ կհաղթի բռնակպետությանը»։ Խոստանալով հետագա տնտեսական պատասխան քայլեր՝ ԱՄՆ նախագահը Պուտինի մասին ասել է․
«Նա գաղափար չունի, ինչ է իրեն սպասվում։ Վեց օր առաջ Պուտինը փորձեց սասանել ազատ աշխարհի հիմքերը՝մտածելով, որ կարող է նրան ստիպել խոնարհվել իր սպառնալիքի առաջ։ Սակայն նա սխալ հաշվարկեց։ Նա մտածում էր, որ կմտնի Ուկրաինա և աշխարհը կփլուզվի։ Դրա փոխարեն նրան դիմավորեց հզոր պատ, որը նա չէր կարող պատկերացնել՝ ուկրաինացի ազգը»։
Բայդենը հայտարարել է, որ Պուտինի պատերազմը կանխամտածված էր և առանց հրահրման:
«Նա մերժեց դիվանագիտական կրկնվող ջանքերը… Նա կարծում էր, որ Արևմուտքն ու ՆԱՏՕ-ն չեն արձագանքի: Եվ նա կարծում էր, որ կարող է բաժանել մեզ։ Պուտինը սխալվում էր: Մենք պատրաստ էինք»,-ասել է ԱՄՆ նախագահը՝ընդգծելով, որ ԱՄՆ-ն պատրաստ է «պաշտպանել ՆԱՏՕ-ի տարածքի ամեն թիզը, սակայն չի պատրաստվում կռվել Ուկրաինայում»։
«Թույլ տվեք հստակ ասել, մեր ուժերը չեն ներգրավվի Ուկրաինայում ռուս զինվորականների հետ հակամարտության մեջ։ Մեր զինվորականները չեն գնա Եվրոպա Ուկրաինայում կռվելու, բայց նրանք կպաշտպանեն ՆԱՏՕ-ի մեր դաշնակիցներին»,-ասել է Բայդենը։ Նրա խոսքով՝ ԱՄՆ-ն մոբիլիզացնում է ցամաքային, ծովային և օդային ուժերը՝ պաշտպանելու իր դաշնակիցներին, այդ թվում՝ Լեհաստանին, Ռումինիային, Լատվիային, Լիտվային և Էստոնիային։
Բացի այդ ԱՄՆ նախագահը հայտարարել է, որ գործընկերների հետ մանրամասն նախապատրաստվել են Ուկրաինա ռուսական ներխուժմանը։ Բայդենը հայտնել է նաև ևս մեկ պատժամիջոցի մասին ՌԴ-ի դեմ՝ նշելով, որ ԱՄՆ-ն կփակի իր օդային տարածքը ռուսական ինքնաթիռների համար՝ Կանադայի և եվրոպական իշխանությունների նմանատիպ արգելքներից հետո:
Էմմա Չոբանյան
