15.12.2025 | 15:14
Պապոյանը՝ Բաքվից նավթ գնելու մասին//Լեհ երկրպագուների գործով ձերբակալվածներից 5-ը ռուսներ են․ ԼՈՒՐԵՐ
Անկախ 2018-ի՝ վարչապետի անձից, գործ եք ունենալու Սերժ Սարգսյանի հետ․ Է․ Շարմազանով
Քաղաքականություն
21.06.2017 | 13:38
ԱԺ փոխնախագահ, ՀՀԿ խոսնակ Էդուարդ Շարմազանովը խորհրդարանում Կառավարության ծրագրի վերաբերյալ արտահերթ ելույթով հանդես եկավ՝ նկատելով, որ այն «ամենագլխավոր քաղաքական փաստաթուղթն է, ուստի իր ելույթն էլ քաղաքական ուղղվածություն է ունենալու»:
Ըստ ՀՀԿ խոսնակի՝ ծրագիրը հիմնված է ՀՀԿ-ի, ՀՅԴ-ի նախընտրական ծրագրերի ու Սերժ Սարգսյանի՝ մայիսի 18-ին խորհրդարանում հնչեցված ելույթի հիմնադրույթների վրա: «Այո՛, մենք այսօր ունենք բազմաթիվ մարտահրավերներ, և այս ծավալուն փաստաթղթի մեջ հստակ, ուղիղ ներկայացված են այդ մարտահրավերներին դիմակայելու միջոցները: Անվտանգության բազում մարտահրավերներ ունենք, գումարած ահաբեկչության մարտրահրավերը, Հայաստանից մինչև Սիրիա ուղիղ մի քանի 100 կմ է, մենք,՝որպես քաղաքական իշխանություն, պարտավոր ենք բոլոր բացասական պատճառները դիտարկել»,-ասաց նա։
Անդրադառնալով ընդդիմադիրների քննադատություններին, թե ԼՂ կոնֆլիկտը մի տողով է գրված, Շարմազանովը նկատեց՝ «մի տողով, բայց շատ դիպուկ»: «Իշխանությունը ևս մեկ անգամ վերահաստատում է՝ Արցախի ժողովրդի ճակատագիրն ու ապագան պետք է նախևառաջ որոշի հենց Արցախի բնակչությունը, մենք ջանք չենք խնայելու, որ հասնենք Արցախի Հանրապետության դե յուրե ճանաչմանը»,- հայտարարեց Էդուարդ Շարմազանովը։
Շարմազանովի վստահեցմամբ՝ իշխանությունը պայքարելու է կոռուպցիայի դեմ՝ապահովելով տարեկան 5 տոկոս տնտեսական աճ, նվազագույն աշխատավարձի բարձրացում 25 տոկոսով, աղքատության կրճատում 12 տոկոսային կետով: Շարմազանովը հարց հնչեցրեց՝ բավարա՞ր է, թե՞ ոչ, ապա հավելեց․ «Եթե ցանկությունների դաշտից գնանք, մենք ունենք ավելի ցանկություններ, բայց պետք է լինենք իրատեսական ու չգնանք պոպուլիզմի ճանապարհով: Իրատեսակա՞ն են, կարծում եմ՝ այո, մենք պետք է գնանք կոնկրետ գործողությունների»:
ՀՀԿ խոսնակն անդրադարձավ նաև «Ելք» խմբակցության պատգամավորների «մտահոգությանը», թե 2018-ից հետո ով է լինելու երկրի վարչապետը․ «Մենք այլևս խորհրդարանական հանրապետություն ենք, իսկ ընտրություններին ժողովուրդը վստահության քվե տվել է քաղաքական կոալիցիոն ուժերին՝ ՀՀԿ-ին՝ Սերժ Սարգսյանի գլխավորությամբ ու ՀՅԴ-ին: Հետևաբար, անկախ 2018-ին վարչապետի անձից՝ գործ պետք է ունենաք քաղաքական իշխանության հետ՝ ՀՀԿ-ի ու ՀՅԴ-ի հետ, մեր պարագայում գործ պիտի ունենաք ՀՀԿ-ի հետ՝ նախագահ Սարգսյանի գլխավորությամբ»։
