16.09.2026 | 21:15
Վթար Չարենցավան-Հրազդան ավտոճանապարհին. նախնական տվյալներով՝ կան չորս զոհ, մեկ տուժած
Վրաստանի իշխանությունները հայտարարել են, որ թույլ չեն տա երկիրը ներքաշել Ուկրաինայի հակամարտության մեջ
Քաղաքականություն
01.03.2022 | 19:20
Վրացական ընդդիմադիր «Ազգային միացյալ շարժում» կուսակցությունը փորձում է երկիրը ներքաշել Ուկրաինայում հակամարտության մեջ, իսկ Վրաստանի իշխանությունները դա թույլ չեն տա։ Այս մասին հայտարարել է իշխող «Վրացական երազանք» կուսակցության ղեկավար Իրակլի Կոբախիձեն, գրում է ՌԻԱ Նովոստին։
Նա նշել է, որ Թբիլիսիից բացի՝ ՌԴ-ի դեմ պատժամիջոցներից հրաժարվել են նաև Մոլդովան, Ադրբեջանը, Իսրայելը և այլ երկրներ, սակայն «ուկրաինական կողմն այդ երկրներից իր դեսպաններին հետ չի կանչել՝ ի տարբերություն Վրաստանի»։
«Դրանում խնդիրը մեկն է՝ շահագրգռվածությունն այն է, որ ռազմական հակամարտությանը միանան Մոլդովան, Իսրայելը կամ մյուսները։ Ո՛չ… մենք չենք միանա ռազմական հակամարտությանը»,- ասել է Կոբախիձեն՝ Թբիլիսիից դեսպանին հետ կանչելու՝ Կիևի որոշումը անընդունելի և չարդարացված որակելով։
Հիշեցնենք, որ ավելի վաղ Վրաստանի վարչապետ Իրակլի Ղարիբաշվիլին հայտարարել էր, որ ազգային շահերից ելնելով՝ Թբիլիսին պատժամիջոցներ չի կիրառի ՌԴ-ի դեմ։ Ի պատասխան՝ Ուկրաինան որոշել է խորհրդակցությունների համար հետ կանչել այդ երկրում իր դեսպանին։
Էմմա Չոբանյան
