ՀՀ-ին պատերազմի վտա՞նգ է սպառնում. Պուտինի սանձազերծած ագրեսիայի հնարավոր հետևանքները․ ՏԵՍԱՆՅՈՒԹ

Վլադիմիր Պուտինի հրամանով՝ այսօր վաղ առավոտից սկսվել է Ռուսաստանի ռազմական հարձակումը Ուկրաինայի վրա: Միջազգային մամուլը հայտնում է՝ հրթիռներ են արձակվել ուկրաինական երկու տասնյակից ավելի քաղաքների օդանավակայանների և ռազմական ենթակառուցվածքների վրա։ Հաղորդվում է նաև զոհերի և վիրավորների մասին: Երևանում չեն բացառում, որ Կիևի ու Մոսկվայի միջև թեժացող պատերազմն իր բացասական ազդեցությունը կունենա նաև Հայաստանի վրա:

Չնայած մինչ այս պաշտոնական Երևանը չեզոք դիրքորոշում է ցուցաբերել, քաղաքագետ Ստեփան Գրիգորյանն իրադարձությունների զարգացման այլ ընթացք է կանխորոշում: Գրիգորյանն ասում է՝ եթե Երևանը հօգուտ Մոսկվայի դիրքորոշում հայտնի, ապա Արևմուտքի պատժամիջոցներն անխուսափելի կլինեն:

Քաղաքագետ Տիգրան Գևորգյանի խոսքով էլ՝ Հայաստանը Ռուսաստանի հետ չպետք է հայտնվի բարիկադների նույն կողմում, քանի որ հետևանքները մեր երկրի համար ծանր կլինեն:

Ռուս-ուկրաինական խորացող հակամարտության ֆոնին՝ մարտական գործողությունների մեկնարկից կարճ ժամանակ անց հայտնի դարձավ Հայաստանի պաշտպանության նախարար Սուրեն Պապիկյանի մոսկովյան այցի մասին: Ըստ Հայաստանի ՊՆ-ի՝ Պապիկյանը հանդիպելու է ռուսաստանցի գործընկեր Սերգեյ Շոյգուի հետ: Երևանում Պապիկյանի այցը պատահական չեն համարում:

Վերլուծաբանները չեն բացառում, որ Ռուսաստանը մինչև անգամ Ուկրաինայի գրավյալ տարածքներում խաղաղապահների տեղակայման հարց կբարձրացնի:

Ավելի վաղ ՀԱՊԿ գլխավոր քարտուղար Ստանիսլավ Զասը հայտնել էր, որ ՀԱՊԿ խաղաղապահներ կարող են տեղակայվել միայն ՄԱԿ-ի Անվտանգության խորհրդի մանդատով: Քաղաքագետ Տիգրան Գևորգյանն անհավանական է համարում այս սցենարը:

Երևանում մտահոգություններ կան նաև, որ Ռուսաստանի սանձազերծած պատերազմի հետևանքները կզգացվեն հայ-ադրբեջանական սահմանին:

Այսօր սկսված ռուս-ուկրաինական պատերազմի առնչությամբ պաշտոնական Երևանը որևէ դիրքորոշում չի հայտնել։ Նկատենք, սակայն, որ Ղազախստանում նախատեսված է Եվրասիական միջկառավարական խորհրդի նիստը, որին մասնակցում է նաև վարչապետ Նիկոլ Փաշինյանը: Ըստ ամենայնի, Ռուսաստանի հետ անվտանգային և տնտեսական համագործակցության պայմանագրեր ունեցող պետությունների ղեկավարները պատերազմի թեման չեն շրջանցի:

Մանրամասները՝ տեսանյութում։

Նարեկ Կիրակոսյան