10.09.2026 | 19:43
Արմաշի նախկին զորանոցի տարածքը հետ են վերցնում Ջրային կոմիտեից․ «Արարատ» ՋՕԸ-ն այն չի օգտագործել
Կհասնենք նրան, որ բոլոր երեխաները գոնե 1 տարի նախադպրոցական կրթություն ունենան. Ժաննա Անդրեասյան․ ՏԵՍԱՆՅՈՒԹ
Հասարակություն
21.02.2022 | 11:52
Նախադպրոցական կրթության, հանրակրթության, ինչպես նաև նախնական և միջին մասնագիտական կրթության ոլորտների համար փորձ է արվում մեկ միասնական կառուցվածք որդեգրել։ Այս մասին այսօր հրավիրված ասուլիսում նշեց ԿԳՄՍ փոխնախարար Ժաննա Անդրեասյանը:
«Կրթության զարգացման պետական ծրագիրը պետք է անդրադառնա թե՛ ենթակառուցվածքներին, թե՛ կրթական բովանդակությանը, թե՛ դասավանդողներին և մարդկային այն ռեսուրսին, որը ներգրավված է տվյալ ոլորտի կրթական գործընթացներում։ Իրականացրել ենք վերլուծություն, և նշեմ, որ կրթության զարգացման ծրագրի նախագիծը շարունակում է կառավարության ծրագրի և մեր մյուս ռազմավարական փաստաթղթերի հիմնական թիրախների տրամաբանությունը»,– ասաց Անդրեասյանը։
Նա ընդգծեց, որ նախադպրոցական կրթության ոլորտի համար սահմանվել են, որ մինչև ռազմավարության ժամկետի ավարտը անհրաժեշտ է որոշակի արդյունքների հասնել` բոլոր բնակավայրերում պետք է հասանելի լինեն մատչելի նախադպրոցական ծառայությունները։
Փոխնախարարը վստահեցրեց` այդ ուղղությամբ գերատեսչությունն արդեն իսկ քայլեր է ձեռնարկում։
Նրա խոսքով՝ պետությունը նաև ֆինանսավորում կհատկացնի այն խմբերին, որոնք ունեն դժվար մատչելիություն նախադպրոցական կրթությանը, այդ թվում են կրթության և զարգացման հատուկ կարիքներ ունեցող երեխաները, սոցիալապես անապահով, բազմազավակ ընտանիքների երեխաները և այլ առաջնահերթ կարիքներ ունեցող խմբերի երեխաները:
Անդրեասյանն ընդգծեց, որ ԿԳՄՍՆ- ն նպատակ ունի այնպես անել, որպեսզի դպրոց ընդունվող բոլոր երեխաներն առնվազն մեկ տարի ընդգրկված լինեն նախադպրոցական ծառայությունում. «Կառավարության ծրագրով նախատեսված է, որ 3-5 տարեկան երեխաների առնվազն 85 %–ն ընդգրկված լինի նախադպրոցական ծրագրերում»։
Մանրամասները՝ տեսանյութում:
