«Ուսանողությունը դառնում է այս համակարգի փլուզման խորհրդանիշ». Զարուհի Հովհաննիսյան

«Արժանապատվություն ունեցող ցանկացած մեկը հիմա իր պաշտոնից հեռացել էր վաղուց»,- Factor.am-ի հետ զրույցում այսօր ասաց իրավապաշտպան Զարուհի Հովհաննիսյանը։

Նրան զարմացնում է, որ Սերժ Սարգսյանը այսքան պայթյունավտանգ վիճակում դեռ նշանակումներ է անում։ Նա վստահ է, որ Նիկոլ Փաշինյանի շարժումը հնարավոր չէ կանգնեցնել ոստիկանական որևէ գործողությամբ կամ հատուկ միջոցներ կիրառելով։ «Անգամ «Էլեկտրիկ Երևանի» և ՊՊԾ գնդի գրավման օրերին ես չեմ տեսել այսպիսի անհնազանդություն։ Այս դեպքում հստակ են նաև ընդդիմության գործողությունները»,- նկատում է տիկին Հովհաննիսյանը։

Իրավապաշտպանին դուր է գալիս, որ շարժման առանցքում ուսանողությունն է, դա նշանակում է, որ եթե անգամ շարժումը ընդհատվի էլ, երբեք չի դադարի։ «Որովհետև իշխանությունը այսքան տարիներ ակտիվորեն օգտագործել է կրթական ռեսուրսը ցանկացած ընտրության ժամանակ, ուսանողությունը եղել է կառավարման խայտառակ համակարգի հենասյունը։ Ուսանողությունը դառնում է այդ համակարգի փլուզման խորհրդանիշ»,- ասում է տիկին Հովհաննիսյանը։

Նա համոզված է, որ ժողովուրդը շարունակելու է դիմադրել, ավտորիտար համակարգն այլևս չի աշխատելու։ Ինչ վերաբերվում է ոստիկանության գործողություններին, ըստ իրավապաշտպանի, այդ կառույցը հավատարիմ է մնալու իր ոճին: «Ոստիկանությունը պիտի իմանա, որն խաղաղ հանրահավաքների իրավունքն առավել հիմնարար է տվյալ իրավիճակում, քան մարդկանց ազատ տեղաշարժի իրավունքը»։

Զարուհի Հովհաննիսյանը Սերժ Սարգսյանին խորհուրդ է տալիս հեռանալ՝ 2008-ին իշխանությունը ձևավորվեց բռնությամբ և տասը տարի շարունակում էր ձևավորվել նույն մեթոդով։ «Այդ շղթան մի օր պետք է կտրվեր»,-ասում է իրավապաշտպանը։

Մհեր Արշակյան