10.02.2026 | 11:16
Նման հայտարարություն ընդունելուց հետո ՀՀ գլխավոր դատախազը, դատավորներ պետք է պաշտոնանկ արվեն․ Վարդանյան․ ՏԵՍԱՆՅՈՒԹ
Ռուսաստանը ԱՄՆ-ին գրավոր պատասխան է փոխանցել Ուկրաինայի շուրջ իրավիճակի ապաէսկալացման առաջարկներին․ The Washington Post
Քաղաքականություն
01.02.2022 | 13:15
Ռուսաստանն ԱՄՆ-ին գրավոր պատասխան է փոխանցել Ուկրաինայի շուրջ իրավիճակի ապաէսկալացիայի առաջարկներին։ Այս մասին հայտնում է The Washington Post-ը՝ վկայակոչելով Պետքարտուղարության անանուն ներկայացուցչին։
«Մենք կարող ենք հաստատել, որ գրավոր պատասխան ենք ստացել Ռուսաստանից»,- ասել է պարբերականի զրուցակիցը։
Փաստաթղթի բովանդակությունը չի բացահայտվել, քանի որ ԱՄՆ-ը փաստաթղթի հանրային քննարկումն «անարդյունավետ» է համարում․ այս հարցը ևս պետք է Մոսկվան որոշի։
«Դա թողնենք Ռուսաստանի հայեցողությանը։ Մենք լիովին հավատարիմ ենք մնում այս խնդիրների լուծման համար երկխոսությանը և կշարունակենք սերտ խորհրդակցությունները մեր դաշնակիցների ու գործընկերների, այդ թվում՝ Ուկրաինայի հետ»,- հավելել է Պետքարտուղարության ներկայացուցիչը։
The Washington post-ը հիշեցնում է, որ հրապարակավ Մոսկվան հոռետեսորեն է արձագանքել Բայդենի վարչակազմի գրավոր առաջարկին։
«Չի կարելի ասել, որ մեր տեսակետները հաշվի են առնվել կամ մեր մտահոգությունները հաշվի առնելու պատրաստակամություն է դրսևորվել»,- հայտարարել է Կրեմլի խոսնակ Դմիտրի Պեսկովը։
Պետքարտուղար Էնթոնի Բլինքենն ԱՄՆ-ի առաջարկը նկարագրել է որպես մի բան, որը Կրեմլին առաջարկում է «լուրջ դիվանագիտական ուղի՝ առաջ շարժվելու համար, եթե Ռուսաստանը դա ընտրի»: Միաժամանակ, ամերիկացի այլ պաշտոնյաներ էլ իրենց հերթին հայտարարել են, որ Արևմուտքը չի խոնարհվել Ռուսաստանի պահանջի առաջ, որ ՆԱՏՕ-ն փակի իր «բաց դռների քաղաքականությունը»՝ արգելելով այնպիսի երկրներին, ինչպիսիք են Ուկրաինան և Վրաստանը, միանալ ռազմական դաշինքին:
Տաթև Ֆռանգյան
