05.03.2026 | 16:46
«Բարսելոնայի» նախագահի պաշտոնին հավակնում է երկու թեկնածու
«Ադրբեջանի տարածքների «օկուպացիայից ազատագրումն» ուրախացրել է Իրանին»․ Իրանի ԳՇ պետը՝ Ադրբեջանի ՊՆ ղեկավարին
Քաղաքականություն
25.01.2022 | 19:14
Ադրբեջանի պաշտպանության նախարար Զաքիր Հասանովը Թեհրանում հանդիպել է Իրանի ԶՈՒ Գլխավոր շտաբի պետ Մոհամմադ Հոսեյն Բաղերիի հետ։ Այս մասին հայտնում է իրանական IRNA գործակալությունը։
Մասնավորապես, Իրանի ԳՇ պետն ասել է, որ Իրանն ու Ադրբեջանն ունեն շատ պատմական, կրոնական, լեզվական նմանություններ, և Իրանի նպատակն է՝ զարգացնել հարևանների հետ հարաբերությունները՝ դեմ լինելով որևէ օկուպացիայի։
«Մենք միշտ ուրախ ենք տեսնել մեր ադրբեջանցի եղբայրներին, քանի Իրանի ամբողջ ժողովուրդը մտերիմ է զգում Ադրբեջանի մուսուլման ժողովրդին»,- ասել է Բաղերին։
Անդրադառնելով օկուպացիայի դեմ Իրանի քաղաքականությանը՝ իրանցի բարձրաստիճան զինվորականն ասել է․ «Ադրբեջանի տարածքների «օկուպացիայից ազատագրումը», որը տեղի է ունեցել երեք տասնամյակ անց, ուրախացրել է Իսլամական հեղափոխության գերագույն հոգևոր առաջնորդին և Իրանի ժողովրդին»։
Հավելենք, որ Իրան կատարած երկօրյա այցի ընթացքում Զաքիր Հասանովը հանդիպելու է բարձրաստիճան ռազմական և քաղաքական գործիչների հետ։ Այցի հիմնական նպատակն է՝ զարգացնել ու խորացնել համագործակցությունը անվտանգության և պաշտպանության ոլորտներում։
Էմմա Չոբանյան
