19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Ալիևը կրկին հիշել է, այսպես կոչված, «Զանգեզուրի միջանցքի» մասին
Քաղաքականություն
25.01.2022 | 17:21
Ադրբեջանի նախագահ Իլհամ Ալիևն այսօր տեսակապով հանդիպում է ունեցել Բաքվում գտնվող Իրանի ճանապարհների ու քաղաքաշինության նախարար Ռուստամ Ղասեմիի հետ։ Իրանցի պաշտոնյան, հիշեցնենք, Ադրբեջան այցը սկսել էր Արցախի գրավյալ Վարանդայից՝ վայրէջք կատարելով տեղի օդանավակայանում։
Ադրբեջանական լրատվամիջոցների հաղորդմամբ՝ Ալիևը, մասնավորապես, նշել է, որ Արցախյան պատերազմից հետո տարածաշրջանային համագործակցության հիանալի հնարավորություններ են ստեղծվել։
«Պատերազմից հետո իրանա-ադրբեջանական հարաբերություններն այդ ուղղությամբ ավելի լայն շրջանակ ձեռք բերեցին։ Տարածաշրջանային համագործակցության հաստատման համար ներկայում ստեղծվել է «3+3» հարթակը, արդեն տեղի է ունեցել առաջին հանդիպումը»,- ասել է Ալիևը՝ համոզմունք հայտնելով, որ առաջիկայում իրանական ընկերություններն ակտիվորեն մասնակցելու են Արցախի գրավյալ տարածքների վերականգնման աշխատանքներին։
Ադրբեջանի նախագահը հերթական անգամ խոսել է նաև գոյություն չունեցող, այսպես կոչված, «Զանգեզուրի միջանցքից»։
«Երեկ դուք նաև ծանոթացել եք «Զանգեզուրի միջանցքի» ստեղծման աշխատանքներին։ Արդեն ակտիվորեն կառուցվում է ավտոմոբիլային ու երկաթուղային ճանապարհը, և մենք Հայաստանից դրական ազդակներ ենք ստանում։ Հայաստանը նախատեսում է սկսել տվյալ աշխատանքը։ Հուսով եմ՝ հետպատերազմյան փուլը նոր հնարավորություններ կբացի տարածաշրջանի համար, որում, իհարկե, կարևոր է Իրանի ներդրումը»,- ասել է Ալիևը։
Նա նաև նշել է, որ Իրանի նախագահի հետ նոյեմբերի վերջին կայացած հանդիպումը շատ հաջողված է եղել և նոր հնարավորություններ է բացում իրանա-ադրբեջանական կապերի համար։
Էմմա Չոբանյան
