16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Բորդյուժան՝ ՀԱՊԿ զորքերը Ուկրաինայի սահմանին տեղակայելու հավանականության մասին
Քաղաքականություն
25.01.2022 | 17:31
Ուկրաինայի սահմանին ՀԱՊԿ ուժերի տեղակայումը կարող է իրականացվել միայն կազմակերպությունում ընդգրկված բոլոր երկրների կոնսենսուսի հիման վրա։ Այսօր կազմակերպված տեսակամուրջի ժամանակ այս մասին ասել է ՀԱՊԿ նախկին գլխավոր քարտուղար, Եվրասիական տեղեկատվական և վերլուծական կոնսորցիումի համակարգող խորհրդի նախագահ Նիկոլայ Բորդյուժան։
Նրա խոսքով՝ զորքերի ցանկացած տեղափոխում ՀԱՊԿ անդամ երկրների տարածքի ցանկացած կետ հնարավոր է միայն այն դեպքում, եթե որոշում կայացվի կոնսենսուսի հիման վրա։ Ըստ Բորդյուժայի՝ եթե իրավիճակը վերլուծելիս վեց պետությունների ղեկավարները կոլեկտիվ զորակազմի տեղակայման մասին որոշում կայացնեն, դա կարվի։
«ՀԱՊԿ-ի հավաքական ներուժը, որպես կանոն, օգտագործվում է, եթե պետությունն այդ պահին չի կարողանում օգտագործել իր ներքին ռեսուրսները, հարթեցնել, չեզոքացնել իրեն սպառնացող վտանգները։ Միայն այս դեպքում օգնության են հասնում դաշնակիցները»,- ասել է նա։
Բորդյուժան նշել է, որ Ռուսաստանն այսօր կարիք չունի խնդրելու՝ օգտագործել ՀԱՊԿ-ի հավաքական ներուժը՝ իրեն սպառնացող վտանգներից պաշտպանվելու համար։
«Հետևաբար, այսօր անհրաժեշտություն չկա որևէ տեղակայման մասին խոսելու»,- ասել է նա՝ պատասխանելով սադրանքի դեպքում ՀԱՊԿ ուժերը Ուկրաինայի հետ սահմանին տեղակայելու հավանականության մասին հարցին։
Տաթև Ֆռանգյան
