19.12.2025 | 19:47
Քննարկվել են մայրաքաղաքում երթևեկության ծանրաբեռնվածության նվազեցմանն ուղղված առաջարկներն ու իրավիճակային լուծումները
Թուրքիայի ԱԳՆ-ն դուրս է մնացել քաղաքականության մշակումից, այն վերածվել է Էրդողանի կուսակցության գաղափարական կոմիսարիատի․ թուրք դիվանագետ
Քաղաքականություն
20.01.2022 | 23:30
Թուրքիայի ԱԳ նախարարությունը վերածվել է նախագահ Ռեջեփ Թայիփ Էրդողանի «Արդարություն և զարգացում» կուսակցության գաղափարական կոմիսարիատի։ Այս մասին T24 news-ի հետ հարցազրույցում հայտարարել է ԱՄՆ-ում Թուրքիայի նախկին դեսպան Նամըք Թանը, գրում է «Ահվալ» գործակալությունը։
«Թուրքիայի արտաքին քաղաքականության ամենակարևոր խնդիրներից մեկն այսօր այն է, որ գրեթե բոլոր որոշումները մեկ մարդ՝ նախագահն է ընդունում։ Սա լուրջ թերություններ ունի։ Արտաքին քաղաքականությունն, անձնական պատճառներով որոշելը կանխատեսելի չէ։ Այն ռիսկեր ու անապահովություն է պարունակում։ Այն հեռացնում է իրական դաշնակիցներից ու ընկերներից, և դու չես կարող միայնությունից խուսափել»,- ասել է Թանը։
Նա նշել է, որ Էրդողանի ԱԶԿ-ի գլխավոր քաղաքական նպատակը երկիրը պոպուլիստական հասկացություններով կառավարելն է, ինչի էլ օգտագործում են բոլոր հնարավոր միջոցները՝ ամեն գնով հանրության աջակցությունը ստանալու համար, և օգտագործում են մարդկանց դժգոհությունները իրենց սեփական շահերի համար։ Ըստ Թանի՝ ԱԳՆ-ն այժմ վերածվել է միջազգային հաղորդակցության գործակալության։
Դիվանագետն ասել է, որ վերջին մի քանի տարիներին 25 նախկին քաղաքական գործիչներ նշանակվել են դեսպաններ և շատ նախկին նախարարներ, խորհրդարանի պատգամավորներ և նրանց հարազատներն արտերկրում են պաշտոններ ստացել։
Նամըք Թանը նշել է, որ պոպուլիստական քաղաքական գործունեությունը բացասական հետևանքներ է ունեցել տարածաշրջանային ու գլոբալ կայունության վրա, քանի որ Թուրքիայի կառավարությունը հեռացել է ժողովրդավարական նորմերից, փափուկ ուժը դիվանագիտության մեջ փոխարինվել է կոշտ ուժով։
«Միջազգային ասպարեզում Թուրքիան սկսել է հիշատակվել ռազմական հզորության տեսակետից։ Արդյունքում, երկրի գլոբալ իմիջը վատթարացել է, և երկար ժամանակ կպահանջվի վերականգնման համար»,- ասել է Թանը՝ նշելով, որ եթե Թուրքիայի քաղաքական ղեկավարությունը լսեր նախարարության պրոֆեսիոնալ անձնակազմի կանխատեսումներն ու առաջարկությունները, կհասկանար, որը երկիրը կարող է միայնության մեջ ընկնել և անհրաժեշտ քայլեր կձեռնարկեր՝ դա կանխելու համար։
Էմմա Չոբանյան
