Ռաիսին Պուտինի հետ հանդիպմանն ընդգծել է Կովկասում սահմանների անձեռնմխելիության կարևորությունը

Թեհրանի և Մոսկվայի հարաբերությունները գտնվում են ռազմավարական հարաբերությունների մակարդակում։ Այս մասին հայտարարել է Իրանի նախագահ Էբրահիմ Ռաիսին Մոսկվա կատարած այցի ընթացքում ՌԴ նախագահ Վլադիմիր Պուտինի հետ հանդիպման ժամանակ, գրում է Tasnim news agency-ն։

Ռաիսին նաև ընդգծել է Կովկասում սահմանների անձեռնմխելիության և տարածաշրջանի ազգային ու աշխարհաքաղաքական ինքնիշխանության կարևորությունը։

Անդրադառնալով տարածաշրջանում և աշխարհում Իրանի ու Ռուսաստանի ազդեցիկ դերին՝ Իրանի նախագահն ասել է.
«Մենք սահմանափակումներ չունենք Ռուսաստանի հետ հարաբերությունների զարգացման հարցում, իսկ Թեհրանի և Մոսկվայի կապերը գտնվում են ռազմավարական հարաբերությունների մակարդակում և դեռ կբարելավվեն»։

Ռաիսին նաև համատեղ գործակցության հիմք է համարել երկու երկրների ընդհանուր ըմբռնումը տարածաշրջանային և միջազգային հարցերի վերաբերյալ։ Բացի այդ, նա Իրանի արտաքին քաղաքականության առաջնահերթություններից է անվանել հարևանների և դաշնակից երկրների հետ առավելագույն փոխգործակցությունը։

«Իրանի և Ռուսաստանի միջև երկկողմ համագործակցության ամրապնդումը կխթանի երկու երկրների տնտեսությունները և կբարձրացնի տարածաշրջանային և համաշխարհային անվտանգությունը»,- հավելել է նա։

Էբրահիմ Ռաիսին նաև շեշտել է, որ Իրանի համագործակցությունը անկախ կառավարությունների հետ ընդլայնվում է՝ անկախ միջազգային զարգացումներից՝ հավելելով, որ ահաբեկչության և թմրամիջոցների ապօրինի շրջանառության դեմ պայքարը համատեղ համագործակցության հիմնասյուներից են։

«Սիրիայում ահաբեկչության դեմ պայքարում համագործակցության հաջող փորձը կարող է կիրառվել նաև Կովկասում և Աֆղանստանում»,- հայտարարել է նա։

Ընդգծելով Կովկասում սահմանների անձեռնմխելիությունը և տարածաշրջանի ազգային ու աշխարհաքաղաքական ինքնիշխանությունը՝ Ռաիսին ընդգծել է տարածաշրջանի տնտեսական զարգացման համար համագործակցության անհրաժեշտությունը․ «Ցանկացած քողի ներքո ՆԱՏՕ-ի ազդեցությունը Կովկասում և Կենտրոնական Ասիայում սպառնում է անկախ երկրների ընդհանուր շահերին»։

Տաթև Ֆռանգյան