Ֆրանսիայում Բաքվի դեսպանը մեղադրանքներ է հնչեցրել Արցախ այցելած Վալերի Պեկրեսի հասցեին. «Ադրբեջանի վրա հարձակումներն անընդունելի են»

Ֆրանսիայի նախագահի թեկնածու Վալերի Պեկրեսի հայտարարությունները մահվան սպառնալիքների մասին ու նրա մշտական հարձակումները Ադրբեջանի վրա անընդունելի են։ Նման հայտարարություն է տարածել Ֆրանսիայում Ադրբեջանի դեսպան Ռահման Մուսթաֆաևը, գրում են ադրբեջանական լրատվամիջոցները։

«Տիկին Պեկրեսը փորձում է դրա տակ թաքցնել իր անօրինական այցն Ադրբեջան։ Նախընտրական քարոզարշավը չի կարող թույլ տալ տիկին Պեկրեսին՝ Իլ դե ֆրանս շրջանի ղեկավարին, խուսափել ադրբեջանական օրենսդրության, Ֆրանսիայի միջազգային, եվրոպական և երկկողմ պարտավորություններից ու Ֆրանսիայի ազգային օրենսդրության պահպանումից»,- ասել է դեսպանը՝մեղադրանքներ հնչեցնելով Պեկրեսի հասցեին։

Մուսթաֆաևը նշել է, որ Պեկրեսի գործողությունները, իբր, հակասում են Ադրբեջանի և Ֆրանսիայի միջև բարեկամության, փոխըմբռնման և համագործակցության պայմանագրին։ Նա ասել է, թե «Պեկրեսի վերաբերմունքը սկզբունքների նկատմամբ, որոնք ընկած են Ադրբեջանի տարածքային ամբողջականության ու ինքնիշխանության հիմքում, անտանելի է և պետք է դադարեցվի»։

«Ընտրողներին գրավելու փորձը կարող է ոչ միայն վտանգել Ադրբեջանի հետ բարեկամական հարաբերությունները՝ հիմնված միջազգային իրավունքի սկզբունքների վրա, այլև խաթարել Կովկասյան տարածաշրջանի կայունությունն ու զարգացումը»,- ասել է դեսպանը։

Հավելենք, որ ավելի վաղ Վալերի Պեկրեսի գլխավորած պատվիրակությունն այցելել էր Արցախի Հանրապետություն։

Այս առնչությամբ Ադրբեջանի նախագահ Իլհամ Ալիևը հայտարարե;լ էր, որ եթե Բաքուն տեղյակ լիներ Պեկրեսի ու նրա պատվիրակության այցից, ապա «նրանց չէին թողնի վերադառնալ»։

Ի պատասխան Ալիևի՝ Պեկրեսը նշել է, որ նման սպառնալիքներն իրեն չեն վախեցնում։

Միաժամանակ, ֆրանսիացի պատգամավորները դիմել են նախագահ Էմանուել Մակրոնին՝ կոչ անելով քայլեր ձեռնարկել Պեկրեսի հասցեին Ալիևի հնչեցրած սպառնալիքներին ի պատասխան։

Էմմա Չոբանյան