10.02.2026 | 16:38
ՌԴ-ի և Ուկրաինայի միջև պատերազմը դադարեցնելու բանակցությունները շարունակվում են, բայց առջևում «երկար ճանապարհ» կա․ Լավրով
Իգդիր-Նախիջևան գազատարի շինարարությունը մեկնարկելու է այս տարի․ հայտնի է՝ որքան գումար է Թուրքիան ներդնելու
Տնտեսություն
18.01.2022 | 15:39
2022 թվականին կմեկնարկի Իգդիր-Նախիջևան գազատարի շինարարությունը, որի համար Թուրքիան նախատեսում է ներդնել 100 մլն լիրա (7.4 մլն դոլար)։ Այս մասին գրում են ադրբեջանական լրատվամիջոցները՝ վկայակոչելով թուրքական ԶԼՄ-ին։
Հրապարակված տվյալների համաձայն՝ գազատարի կառուցման համար մնացյալ 185 մլն լիրան (13.7 մլն դոլար) կհատկացվի 2023 թվականին։
«Այս տարի սկսվելու է գազատարի շինարարությունը, որի միջոցով բնական գազը Իգդիրից հասնելու է Նախիջևան։ Գազատարի թողունակությունը կկազմի օրական 1․5 մլն խորանարդ մետր։ Բացի այդ, նախագծի շրջանակում Դիլուջում գազաբաշխիչ կայան է կառուցվելու։ Այն կգտնվի 20 հազար քառակուսի մետր տարածքի վրա և կապահովի գազատարով գազի հոսքի հավասարակշռությունը։ Այսպիսով, բնական գազը Նախիջևան կմատակարարվի ամենաանվտանգ եղանակով»,- ասվում է հրապարակման մեջ։
Հիշեցնենք, որ դեռևս 2020 թվականի դեկտեմբերի 15-ին Ադրբեջանի և Թուրքիայի էներգետիկայի նախարարները հուշագիր էին ստորագրել Իգդիր-Նախիջևան գազատարի կառուցման վերաբերյալ։ Ծրագիրն իրականացնելու են Ադրբեջանի պետական նավթային SOCAR և թուրքական պետական գազային BOTAŞ ընկերությունները։
Ներկայում Նախիջևանը ստանում է իրանական գազ՝ 2004 թվականին Բաքվի և Թեհրանի միջև կնքված փոխանակման համաձայնագրով, ըստ որի՝ Ադրբեջանը գազ է մատակարարում Իրանում մեկուսացած Աստարա քաղաքին, որը երկրի ներսում գազամատակարարում չունի։ Դրա դիմաց Իրանը գազ է մատակարարում Նախիջևանին ամբողջ ծավալի 85 տոկոսի չափով, իսկ 15 տոկոսը տարանցման վճարն է։
Նոր գազատարի կառուցմամբ Նախիջևանը Թուրքիայի տարածքով ադրբեջանական գազ կստանա։
Էմմա Չոբանյան
