15.12.2025 | 19:50
89 վարորդ տուգանվել է վարելիս նվագարկչի՝ ստանդարտին չհամապատասխանող լրացուցիչ ուժեղացուցիչներ օգտագործելու համար
Հայաստանի պետական պարտքը Սերժ Սարգսյանի պաշտոնավարման շրջանում օրական աճել է 1 միլիոն 421 հազար դոլարի չափով
Տնտեսություն
14.04.2018 | 20:48
Հայաստանի պետական պարտքն այս տարվա ապրիլի 1-ի դրությամբ կազմել է 6 միլիարդ 887 միլիոն 100 հազար դոլար։ Այսինքն, 2018 թվականի մարտ ամսվա ընթացքում Հայաստանի պետական պարտքն աճել է 35 միլիոն 900 հազար դոլարով։ Իսկ ընթացիկ տարվա երեք ամիսների ընթացքում պետական պարտքն աճել է 112 միլիոն 500 հազար դոլարով (2017 թվականի վերջին ՀՀ պետական պարտքը կազմել է 6 միլիարդ 774 միլիոն 600 հազար դոլար)։
Այսպիսով, փաստացի պետք է արձանագրենք, որ Հայաստանը շարունակում է պարտքով ապրել։ Այն հանգամանքը, որ ըստ պաշտոնական վիճակագրության, այս տարվա առաջին՝ հունվար-փետրվար ամիսներին, Հայաստանում արձանագրվել է 7,7 տոկոսի տնտեսական աճ, ամենևին չի նպաստել, որպեսզի պետությունն իր կյանքը կարողանա կազմակերպել սեփական միջոցների՝ այն է՝ հարկեր և տուրքերից հավաքագրված գումարների հաշվին։ Ինչևէ, Հայաստանի պետական պարտքից 5 միլիարդ 574 միլիոն 700 հազար դոլարը դա արտաքին պարտքն է։ Այլ կերպ ասած, այդ գումարը Հայաստանը պարտք է միջազգային բանկերին ու ֆինանսական կազմակերպություններին։
Հարկ է նշել, որ Հայաստանի արտաքին պարտքը մարտ ամսվա ընթացքում աճել է 15 միլիոն դոլարով, իսկ պետական պարտքի մնացած՝ 20 միլիոն 900 հազար դոլարի աճը բաժին է հասնում ներքին պարտքին։
Ի դեպ, այս օրերին ընդունված է բոլոր տվյալները դիտարկել տասը տարվա կտրվածքով՝ Սերժ Սարգսյանի, որպես Հայաստանի նախագահ պաշտոնավարման արդյունքը ի ցույց դնելու նպատակով։ Այս տեսանկյունից հարկ է նշել, որ 2008 թվականի սկզբին, այսինքն մինչև այն պահը, երբ Սերժ Սարգսյանը կզբաղեցներ Հայաստանի ղեկավարի պաշտոնը, մեր պետության պետական պարտքը եղել է 1 միլիարդ 696 միլիոն 900 դոլար։
Ասել կուզի՝ Հայաստանի պետական պարտքը Սերժ Սարգսյանի կառավարման տարիներին աճել է 5 միլիարդ 190 միլիոն 200 հազար դոլարի չափով։ Այլ կերպ ասած, Հայաստանի պետական պարտքը՝ Սերժ Սարգսյանի իշխանության ղեկին մնալու ընթացքում օրական աճել է 1 միլիոն 421 հազար դոլարի չափով։ Սա կարելի է ասել, որ Սերժ Սարգսյանի՝ իշխանության ղեկին մնալու գնի՝ արտաքին պարտքով վերցված մասն է։
Վահագն Հովակիմյան
