Կրակոցներ տարբեր ուղղություններով. ադրբեջանական կողմն ահաբեկում է խաղաղ բնակչությանը. ՏԵՍԱՆՅՈւԹ

Հարաբերական խաղաղությունից հետո տարին մեկնարկել է ադրբեջանական կողմի նոր սադրանքներով։ Ուշագրավ է, որ եթե նախորդ տարեվերջին Ադրբեջանի ոտնձգություններն ավելի շատ ՀՀ սահմանների ուղղությամբ էին, ապա վերջին օրերին ակտիվացում է նկատվում Արցախյան շփման գծում։ Երեկ ադրբեջանցիները տարբեր ուղղություններում կրակ են բացել Արցախի բնակավայրերի ուղղությամբ, թիրախում խաղաղ բնակիչներն են եղել:

Այս կրակոցներով ադրբեջանական կողմը փորձում է ճնշման տակ պահել տեղի բնակիչներին և հասնել Արցախի հայաթափմանը, կարծում է քաղաքագետ Դավիթ Ստեփանյանը։ 

Հիշեցնենք՝ թշնամական պետության զինվորականները երեկ  նախ Կարմիր շուկա գյուղի ուղղությամբ են անկանոն կրակ բացել։ Կրակոցները տևել են մոտ 10 րոպե։ Դրանց հետևանքով հրդեհվել է մանկապարտեզի հարևանությամբ կայանված Ուազ ավտոմեքենան: Դեպքի վայր մեկնած հրշեջ փրկարարները ևս հայտնվել են կրակոցների թիրախում:

Կարճ ժամանակ անց նաև Ասկերանի շրջանի Նախիջևանիկ գյուղի նռան այգիների ուղղությամբ են կրակել՝ թիրախավորելով չորս քաղաքացու: Զոհեր և վիրավորներ չկան, վնասը միայն նյութական է:

Իշխանական թևից ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը արցախահայության  դեմ ուղղված կրակոցներին վերջ տալու մեկ տարբերակ է տեսնում:  Փաշինյանի թիմակցի պատկերացմամբ՝ Հայաստանի ու Ադրբեջանի միջև խաղաղության պայմանագրի կնքումը կարող է լինել խնդրի լուծումը։ 

Ղազախստանում ՀԱՊԿ զորախմբի տեղակայումը, ըստ «Պատիվ ունեմ» խմբակցության պատգամավոր Տիգրան Աբրահամյանի, կարող է կապ ունենալ կրակոցների հետ, քանի որ ըստ նրա՝ ադրբեջանական կողմը ցանկանում է վարկաբեկել ռուս խաղաղապահներին:

Ընդդիմադիր պատգամավորի խոսքով՝ խաղաղ բնակիչներին ահաբեկելու և սպանելու դեպքերը բացառելու համար պետք է անվտանգույան մեխանիզմների ապահովման նոր գործիքակազմ կիրառել:

Հայաստանը մի քանի օր առաջ որպես ՀԱՊԿ անդամ պետություն 100 հոգուց բաղկացած զորահումբ ուղարկեց Ղազախստան: Սա այն պարագայում, երբ ադրբեջանական կողմն անընդհատ խախտում է հրադադարի ռեժիմը, սպանում կամ ահաբեկում խաղաղ բնակիչներին, գերեվարում զինծառայողներին: Անդրանիկ Քոչարյանը խնդրահարույց ոչինչ չի տեսնում, որ այս իրավիճակում գտնվող Հայաստանն է այլ պետության օգնում:

Հիշեցնենք՝  միայն նախորդ տարվա հոկտեմբեր-նոյեմբեր ամիսներին  Ադրբեջանի զինծառայողներն Արցախում երեք խաղաղ բնակիչ են սպանել: 

Նշենք, որ այսօր էլ  Ադրբեջանի ԶՈւ-ը կրակ են բացել Գեղարքունիքի մարզի Վերին Շորժայի հատվածում տեղակայված դիրքերի ուղղությամբ, ինչի հետևանքով մեկ զինծառայող ստացել է միջին ծանրության հրազենային վիրավորում։ Ժամը 17։00-ի դրությամբ՝ իրադրությունը հայ-ադրբեջանական սահմանին հարաբերականորեն կայունացել է։ 

Նարեկ Կիրակոսյան