26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
Պուտինը կարող է դիտարկել մի քանի տարբերակ, եթե Արևմուտքը չտա անվտանգության երաշխիքներ․ VOA-ի անդրադարձը
Քաղաքականություն
27.12.2021 | 22:48
Մոսկվան իր առաջարկներն է ներկայացրել այս ամսվա սկզբին: Պահանջներից մեկը ՆԱՏՕ-ի կողմից դեպի արևելք ընդլայնումն արգելելն է և դաշինքի կողմից ռազմական համագործակցությունը դադարեցնելն այնպիսի երկրների հետ, ինչպիսիք են Ուկրաինան և Վրաստանը, գրում է «Ամերիկայի ձայն»-ը։
Հինգշաբթի օրը, ելույթ ունենալով ամենամյա մամուլի ասուլիսում, Պուտինը կոչ արեց Արևմուտքին անհապաղ անվտանգության երաշխիքներ տրամադրել՝ բազմաթիվ պահանջներ ներկայացնելով Ուկրաինայի և ՆԱՏՕ-ի դեմ։
Նա զգուշացրել է, որ Մոսկվան ստիպված կլինի համապատասխան միջոցներ ձեռնարկել, եթե Արեւմուտքը շարունակի իր ագրեսիվ ընթացքը, որը նրա խոսքերով արդեն հայտնվել է Ռուսաստանի շեմին:
Կիրակի օրը Ռուսաստանի պետական հեռուստատեսության եթերում իր մեկնաբանություններում Պուտինը ասել է, որ ռուսական պատասխանները «կարող են շատ տարբեր լինել»:
«Դա կախված է նրանից, թե ինչ առաջարկներ կանեն ինձ մեր ռազմական փորձագետները»,- հավելել է նա, առանց մանրամասնելու:
ԱՄՆ-ի պաշտոնյաները հրապարակայնորեն հայտարարել են ռուսական պահանջների շուրջ բանակցելու պատրաստակամության մասին։ Սակայն մասնավոր կերպով Վաշինգտոնում և այլուր պաշտոնյաները պնդում են, որ Մոսկվայի որոշ պահանջներ անիրագործելի են կամ արմատապես հակասում են արևմտյան արժեքներին:
Այնուամենայնիվ, Միացյալ Նահանգները և նրա դաշնակիցները համաձայնել են բանակցություններ սկսել Մոսկվայի հետ հունվարին՝ քննարկելու Կրեմլի մտահոգությունները:
Հյուսիսատլանտյան դաշինքի ներկայացուցիչը շաբաթ օրը հայտնել էր, որ ՆԱՏՕ-ի գլխավոր քարտուղար Յենս Ստոլտենբերգը որոշել է հունվարի 12-ին ՆԱՏՕ-Ռուսաստան խորհրդի նիստ հրավիրել, և որ դաշինքն այդ հարցով կապի մեջ է Ռուսաստանի հետ:
ՌԴ ԱԳՆ-ից հայտնել են, որ այս առաջարկը դիտարկվում է, և դրա ձևաչափն ու ժամկետները հստակեցում են պահանջում։ Կայանալու դեպքում այն կդառնա խորհրդի առաջին նիստը երկուսուկես տարվա ընթացքում։
Կիևը և նրան աջակցող արևմտյան երկրները մեղադրում են Ռուսաստանին Ուկրաինայի սահմանների երկայնքով մոտ 100,000 թվակազմով զորքեր տեղակայելու մեջ՝ որպես ներխուժման հնարավոր նախապատրաստություն։ ԱՄՆ-ն և ԵՄ-ն Մոսկվային սպառնացել են ռազմական էսկալացիայի դեպքում լուրջ հետևանքներով: Ռուսաստանը հայտարարել է, որ մտադիր չէ ներխուժել Ուկրաինա:
Ռուսաստանի պաշտպանության նախարարությունը շաբաթ օրը հայտարարեց, որ ավելի քան 10,000 զինծառայողներ ավարտել են մեկամսյա զորավարժությունները Ուկրաինայի մերձակայքում, և որ ներգրավված զինվորականները վերադառնում են իրենց մշտական տեղակայման վայրեր:
Նախարարությունից հայտնել են, որ Հարավային ռազմական օկրուգի զորքերի զորավարժություններն անցկացվել են Ռուսաստանի մի շարք հարավային շրջաններում, այդ թվում՝ Ռոստովի մարզում և Կրասնոդարի երկրամասում, ինչպես նաև դրանցից դուրս՝ ներառյալ Ստավրոպոլի երկրամասում, Աստրախանի մարզում և Հյուսիսային Կովկասում:
Մարտական վարժանքներ են անցկացվել նաև Հայաստանի տարածքում, բռնազավթված Ղրիմում Վրաստանի անջատողական Աբխազիայի և Հարավային Օսիայի շրջաններում:
