Ադրբեջանում լրագրողին տուգանել են բանակում առկա կոռուպցիայի և տիրող իրավիճակի քննադատական հրապարակումների համար

Ադրբեջանական «Յենի չաղ»-ի ռազմական լրագրող Սախավետ Մամեդին դեկտեմբերի 18-ին հրավիրել են երկրի Գլխավոր դատախազություն՝ բանակի մասին նրա հրապարակումների համար։ Այս մասին Մամեդն ասել է «Թուրան»-ի հետ զրույցում։

Նա դեպքի մասին տեղեկացրել է նաև ֆեյսբուքյան գրառմամբ։

Լրագրողը նշել է, որ իրեն տարել են Խաթայի շրջանային դատարան, որն էլ 500 մանաթ (300 դոլար) տուգանք է նշանակել Վարչական իրավախախտումների մասին օրենսգրքի 388-1.1.1 հոդվածով (համացանցի տեղեկատվական հարթակում տեղեկատվության տեղադրումը, որն արգելված է տարածման համար):

Ֆեյսբուքյան գրառմամբ նա նշել է, որ դատարանում հայտնել է՝ այն, ինչ գրել է բանակում տեղի ունեցածի մասին, հետաքննության արդյունք է։ Դատարանը հարցրել է նաև կաշառքի վերաբերյալ նրա հոդվածից։

Հեղինակն անհիմն է համարում պնդումները, թե իր հրապարակումները նվազեցնում են բանակի մարտունակությունը։

«Թուրան»-ը նշում է, որ լրագրողը չի կարողացել ներկայացնել իր հրապարակումները, քանի որ դրանք արդեն հեռացվել են կայքից։ Սակայն նա ասել է, որ քննադատել է իրավիճակը բանակում ու նշել, որ նախկին ԳՇ պետ Նաջմեդդին Սադիկովի պաշտոնից հեռանալուց հետո իրավիճակը չի բարելավվել, քանի որ ԶՈՒ-ում մնում են «ռուսամետ» զինվորականները։ Ըստ նրա՝ բանակի անցումը թուրքական մոդելին բառերով չի որոշվում, ուստի պետք են իրական բարեփոխումներ։

Մամեդը նաև ասել է, որ դատարանի որոշումը ստանալուց հետո կձեռնարկի իր իրավունքների պաշտպանության հետագա քայլերը։

Ադրբեջանի Գլխավոր դատախազությունից հաստատել են, որ Մամեդովը կանչվել է գերատեսչություն, իսկ Խաթայի դատարանը տուգանել է։

Էմմա Չոբանյան