Քաղաքականություն
17.12.2021 | 16:04
ՆԱՏՕ-ն լրջորեն անհանգստացած է «վերջին ամիսներին Ուկրաինայի սահմաններին Ռուսաստանի ռազմական ներկայության զգալի, չհիմնավորված և չարդարացված կուտակմամբ» և մերժում է Կիևի ու դաշինքի կողմից սադրանքների վերաբերյալ «ՌԴ կեղծ մեղադրանքները»: Այս մասին ասված է Հյուսիսատլանտյան դաշինքի խորհրդի հայտարարության մեջ, գրում է DW-ի ռուսական ծառայությունը։
ՆԱՏՕ-ի գլխավոր քաղաքական որոշումները կայացնող մարմինը ՌԴ-ին կոչ է արել «օգտագործել դիվանագիտական ուղիները և կատարել միջազգային պարտավորությունները՝ կապված ռազմական գործունեության թափանցիկության հետ»՝ անհապաղ ապաէսկալացնելով իրավիճակը:
«Ուկրաինայի դեմ ցանկացած հետագա ագրեսիա կունենա լայնածավալ հետևանքներ» և ՌԴ-ն «բարձր գին» կվճարի դրա համար, զգուշացրել են Խորհուրդից։ Այստեղ հավելել են, որ անվտանգային իրավիճակի վատթարացման դեպքում իրենք պատրաստ են, անհրաժեշտության դեպքում, ուժեղացնել իրենց դիրքերը հավաքական պաշտպանության ոլորտում։ Նշվում է, որ ՆԱՏՕ-ն շարունակում է սերտորեն համակարգել իր գործողությունները զարգացումներում ներգրավված կողմերի, ինչպես նաև միջազգային ասոցիացիաների, այդ թվում՝ ԵՄ-ի հետ։
Հյուսիսատլանտյան դաշինքը հիշեցրել է, որ ինչպես նախկինում՝ հավատարիմ է «աջակցելու Ուկրաինայի տարածքային ամբողջականությանը և ինքնիշխանությանը միջազգայնորեն ճանաչված սահմանների շրջանակում», ինչպես նաև կոչ է արել Ռուսաստանին՝ «դուրս բերել զորքերը Ուկրաինայից՝ Մոսկվայի միջազգային պարտականությունների և պարտավորությունների համապատասխան»:
Տաթև Ֆռանգյան
