Քաղաքականություն
25.11.2021 | 19:49Ադրբեջանի ԱԳՆ մամուլի ծառայության ղեկավար Լեյլա Աբդուլաևան այսօր կրկին ադրբեջանական քարոզչամեքենայի հայտնի թեզերն է հնչեցրել՝ նշելով, որ «Ադրբեջանը վերականգնել է իր տարածքային ամբողջականությունը» և հիմա պետք է միջազգային հանրությանը հասցնել «ադրբեջանական ճշմարտությունները»,-գրում են տեղական լրատվամիջոցները։
Աբդուլաևան, ինչպես միշտ, անհիմն մեղադրանքներ է հնչեցրել Հայաստանի հասցեին։
«Հայերի կողմից իրականացված յուրաքանչյուր «հանցագործություն» փաստագրվում և հասցվում է միջազգային համապատասխան կառույցներին։ Աշխատանք է տարվում այս ուղղությամբ, որ «հանցագործությունները» ներկայացվեն միջազգային մակարդակով Հայաստանի դեմ դատական հայցերի տեսքով։ Աշխատանքը շարունակվում է հունվարին Մարդու իրավունքների եվրոպական դատարան ներկայացված հայցի շրջանակում։ Շարունակվում է սեպտեմբերին Արդարադատության միջազգային դատարանում մեկնարկած գործի ընթացքը։ Սա վերջը չէ։ Հայցերի ներկայացման աշխատանքը շարունակվելու է։ Դա շատ կարևոր է, առաջին հերթին՝ միջազգային արդարադատության ապահովման համար»,- ասել է ադրբեջանցի պաշտոնյան։
Նշենք, որ Արցախյան 44-օրյա պատերազմի ավարտից հետո Ադրեջանը մշտապես հայտարարում է, որ միջազգային ատյաններում տարբեր դատական հայցեր է ներկայացնելու Հայաստանի դեմ, սակայն դեռևս միայն հակընդդեմ հայցերով պատասխանում է Երևանի դիմումներին։
Հավելենք, որ Հայաստանն Ադրբեջանի դեմ հայցեր է ներկայացրել ՄԻԵԴ և ՄԱԿ-ի Արդարադատության միջազգային դատարան։
Էմմա Չոբանյան
