16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
ՊՆ-ն պահեստազորայինների վարժական հավաքներ անցկացնելու մասին նախագիծ է ներկայացրել դրանց մեկնարկից ընդամենը 1 օր առաջ
Քաղաքականություն
18.11.2021 | 17:40
Իրավական ակտերի նախագծերի հրապարակման միասնական կայքում Պաշտպանության նախարարության ներկայացրած նախագծից Factor.am-ը տեղեկանում է, որ 2021 թվականի նոյեմբերի 18-ից մինչև դեկտեմբերի 18-ը նախատեսված է անցկացնել պահեստազորայինների վարժական հավաքներ։ Նախագիծը հանրային քննարկման է դրվել երեկ՝ նոյեմբերի 17-ին։
Ըստ ՊՆ-ի՝ վարժական հավաքները հայտարարվում են պահեստազորայինների ռազմական ունակությունների կատարելագործման և վերապատրաստման, նրանց հետ կնքված պայմանագրի համաձայն, ըստ անհրաժեշտության, մարտական հերթապահության ներգրավման նպատակով:
Հավաքներին ներգրավելու է ընդհանուր մինչև 202 քաղաքացի, որոնցից 161-ը` շարքային կազմի, 28-ը` ենթասպայական կազմի, 13-ը` սպայական կազմի պահեստազորայիններ:
ՀՀ առողջապահության նախարարը պետք է ապահովի վարժական հավաքներին ներգրավվող պահեստազորայինների բուժհետազոտումը՝ ըստ ՀՀ ՊՆ զորակոչային և զորահավքային համալրման ծառայության տարածքային ստորաբաժանումների:
Հայաստանի Հանրապետության պաշտպանության նախարարը իրավունք կունենա վարժական հավաքներ անցկացնելու ժամկետում անհրաժեշտությունը վերանալու դեպքում վարժական հավաքներին ներգրավված քաղաքացիներին ժամկետից շուտ արձակել պահեստազոր:
«Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը»,- ասված է նախագծում։
Նախագծի «Հիմնավորում» բաժինը դատարկ է, իսկ փաստաթղթին այս պահի դրությամբ դեմ է արտահայտվել 2 քաղաքացի։
Ուշագրավ է, որ այսօր նոյեմբերի 18-ն է, և ,ըստ փաստաթղթի, վարժական հավաքները պիտի արդեն մեկնարկած լինեին, այնինչ նախագիծը դեռ հանրային քննարկման փուլում է և չի ընդունվել ու իրավական ուժ չի ստացել։
Արփի Հակոբյան
