«Ամեն ինչ փորձում են անել, որ մեզ՝ որպես թեկնածու, դուրս մղեն դաշտից․ «Իկիլիկյան» դաշինքը՝ դատական քաշքշուկների մեջ

Ախուրյան խոշորացված համայնքի ՏԻՄ ընտրություններին մասնակցելու հայտ ներկայացրած «Իկիլիկյան» դաշինքը, որի ավագանու ցուցակը գլխավորում է Ազատան համայնքի 13 տարվա ղեկավար Վարդան Իկիլիկյանը հայտնվել է դատական քաշքշուկների մեջ։

Ինչպես Factor.am-ին պարզաբանեց Վարդան Իկիլիկյանը, դաշինքն ի սկզբանե ավագանու 26 թեկածու էր ներկայացրել թիվ 32 ընտրատարածքային ընտրական հանձնաժողով, փաստաթղթղերը ստուգել էին, որևէ առարկություն չէր եղել, նոյեմբերի 3-ին էլ գրանցել էին՝ որպես թեկնածու։

Ըստ Վարդան Իկիլիկյանի՝ հանձնաժողովում նայելով ցուցակն՝ ասել էին, որ «Իկիլիկյան դաշինք»-ի 26 թեկնածուների կեսից ավելին, այսինքն՝ 14-ը տարբեր բնակավայրերից են, ինչը նշանակում է, որ այս քաղաքական ուժը ապահովել է միավորվող համայնքներից թեկնածուների ներգրավվածությունը։ Սակայն նոյեմբերի 7-ին ընտրատարածքային հանձնաժողովը գրանցումը ճանաչել է անվավեր՝ պատճառաբանելով, որ դաշինքի ցուցակով բնակավայրերի ընդգրկվածությունը չի համապատասխանում օրենքի պահանջին։

«Եթե ագամ սխալ է տեղի ունեցել, ընտրատարածքային հանձնաժողովը մեզ 48 ժամ ժամանակ պիտի տար, որ պակաս փաստաթուղթը լրացնեինք։ Մենք զրկվել ենք դրա իրավունքից, որի պատճառով դիմել ենք վարչական դատարան։ Վարչական դատարանն արագացված դատաքննություն անցկացրեց ու որոշեց, որ հանձնաժողովը սխալ հիմքերով է որոշումը չեղյալ համարել։ Հանձնաժողովի նախկին որոշումը՝ մեր դաշինքի գրանցված լինելու վերաբերյալ, թողեց ուժի մեջ»,- ասում է Վարդան Իկլիկյանը։

Սակայն երկու օր առաջ Վերաքննիչ վարչական դատարան է դիմել Ախուրյան խոշորացված համայնքի ՏԻՄ ընտրություններին մասնակցող «Քաղաքացիական պայմանագիր» կուսակցությունը՝ պահանջելով անվավեր ճանաչել «Իկիլիկյան դաշինք»-ի գրանցումը։

Վերաքննիչ վարչական դատարանում այսօր տեղի է ունեցել դատականը նիստը, դատարանը որոշումը կհրապարակի երկու օր անց։ Վարդան Իկիլիկյանը սա որակում է քաղաքական հետապնդում իր նկատմամբ։ Նա նշում է, որ իր թեկնածությունն առաջադրել էր համայնքի բնակիչների ցանկությամբ, իսկ այժմ նրանց զրկում են ընտրելու իրավունքից։ «Ամեն ինչ փորձում են անել, որ ինձ՝ որպես թեկնածու, դուրս մղեն դաշտից։ Իսկ դա ես թույլ չեմ տա, ինձ համար դա լուրջ վիրավորանք է։ Ժողովրդավարություն ասվածը, որը շատ է շահարկվում մեր երկրում, արժեզրկում են, այս գործելակերպը մեզ համար շատ խորթ է ու անընդունելի»,-ասում է Վարդան Իկիլիկյանը։

Նշենք, որ Վարդան Իկիլիկյանը հայտնի է իր ընդդիմադիր հայացքներով։ Նա ԱԺ արտահերթ ընտրություններում սատարում էր Ռոբերտ Քոչարյանի գխավորած «Հայաստան» դաշինքին։ Հիշեցնենք, որ Ախուրյան կրկնակի խոշորացվող համայնքի ավագանու՝ դեկտեմբերի 5-ին կայանալիք ընտրություններում. «Իկիլիկյան» դաշինքից բացի պայքարում են նաև «Ախուրյան» և «Հաղթանակ» դաշինքները, որոնց թեկնածուները դաշնակցականներ են․ «Ախուրյան» դաշինքինը՝ Ախուրյան խոշորացված համայնքի երկարամյա ղեկավար Արծրուն Իգիթյանն է, «Հաղթանակ» դաշինքինը՝ Մարմաշեն խոշորացված համայնքի ղեկավար Կարեն Արշակյանը։ Դաշինքների հետ մրցակցում է մեկ կուսակցություն՝ «Քաղաքացիական պայմանագիր»-ը, որը գլխավորում է Առափի համայնքի երկարամյա ղեկավար Ալբերտ Այվազյանը։

Արմիկ Մովսիսյան