13.05.2024 | 23:30
Բեռլինը դեմ է Ուկրաինայի հակաօդային պաշտպանությանը ՆԱՏՕ-ի մասնակցելուն
Ադրբեջանական զինուժի ներխուժումը ՊՆ-ն հերքում է, 1 օր անց՝ ԱԽ-ն ու վարչապետը՝ հաստատում. ԵզրաԿԱՑՈՒԹՅՈՒՆ
Քաղաքականություն
15.11.2021 | 18:27
Նոյեմբերի 14-ին ՀՀ Պաշտպանության նախարարությունը հերքեց այն տեղեկությունը, թե հայկական տարածք ադրբեջանական ԶՈւ զրահատեխնիկա է մտել։
«Ժամը 19։00-ի դրությամբ իրադրությունը հայ-ադրբեջանական սահմանի արևելյան ուղղությամբ, որտեղ այսօր ադրբեջանական ԶՈՒ ստորաբաժանումները փորձել էին դիրքային առաջխաղացում ապահովել, հարաբերականորեն կայունացել է, կրակոցներ չկան։ Ընթանում են բանակցություններ՝ իրադրության հանգուցալուծման նպատակով։ Հայկական կողմից տուժածներ չկան։ Հավելենք, որ սոցիալական ցանցերում տարածվող տեղեկությունները, թե սահմանային այդ հատվածում հայկական տարածք ադրբեջանական ԶՈՒ զրահատեխնիկա է մտել, չեն համապատասխանում իրականությանը»,- նշվում է Պաշտպանության նախարարության տարածած հաղորդագրության մեջ։
Սակայն այսօր՝ նոյեմբերի 15-ին, Անվտանգության խորհուրդը հաստատեց նույն տեղեկությունը, ինչը ՊՆ-ն իրականություն չէր համարում։
«Սույն թվականի նոյեմբերի 14-ին ժամը 13.00-ի սահմաններում հայ-ադրբեջանական սահմանագծի արևելյան տեղամասերից մեկում Ադրբեջանի զինված ուժերի ստորաբաժանումները զրահատեխնիկայի աջակցությամբ ներխուժել են Հայաստանի Հանրապետության ինքնիշխան տարածք: Ադրբեջանական ԶՈւ գործողությունների հետևանքով Հայաստանի ԶՈւ չորս մարտական դիրքեր հայտնվել էին շրջափակման մեջ: ՀՀ ինքնիշխան տարածք ներխուժած ադրբեջանական զինտեխնիկան և զորքը բանակցությունների արդյունքում դուրս են եկել ՀՀ տարածքից, ՀՀ ԶՈւ ստորաբաժանումները դուրս են բերվել վերոնշյալ չորս մարտական դիրքերից»,- ասվում է ԱԽ տարածած հաղորդագրության մեջ։
Նիկոլ Փաշինյանն այսօր Անվտանգության խորհրդի նիստում հայտարարել է հայ-ադրբեջանական սահմանի արևելյան տեղամասերից մեկում ադրբեջանական զորքերի կողմից Հայաստանի Հանրապետության տարածք ներխուժման մասին։
Նշենք, որ այսօր պաշտոնանկ արվեց շուրջ 4 ամիս ՊՆ-ն ղեկավարած Արշակ Կարապետյանը։ Պաշտպանության նախարար նշանակվեց փոխվարչապետ Սուրեն Պապիկյանը։ ԱԺ նախագահ Ալեն Սիմոնյանը Factor TV-ի հարցին ի պատասխան՝ նշեց, որ այս իրավիճակում նորմալ է ՊՆ ղեկավարի պաշտոնանկությունը։ Սիմոնյանը վստահ է, որ նման իրավիճակում պետք է ճիշտ քայլեր կատարել։
Մանրամասները՝ տեսանյութում։
Արփի Հակոբյան
