19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
ԱՄՆ Սենատի արտաքին հարաբերությունների հանձնաժողովի նախագահը դեմ է Թուրքիային F-16 կործանիչներ վաճառելուն
Քաղաքականություն
12.11.2021 | 21:58
ԱՄՆ Սենատի արտաքին հարաբերությունների հանձնաժողովի նախագահ Բոբ Մենենդեսը դեմ է Թուրքիային F-16 կործանիչներ և արդիականացման սարքեր վաճառելուն՝ նշելով, որ նախ պետք է բարելավվեն ՆԱՏՕ-ի անդամ պետությունում մարդու իրավունքների պայմանները, գրում է «Ահվալ» գործակալությունը։
«Ես անձնապես կողմնակից չեմ նրանց F-16-եր տալուն։ Ես խնդիր ունեմ։ Սա այն Թուրքիան չէ, որին մենք ձգտում ենք, այն ՆԱՏՕ-ի դաշնակիցը չէ, որն իրեն պահում է այնպես, որ մենք կարողանանք առաջ գնալ ու տալ ամենաբարդ մարտական տեխնիկան»,- ասել է Մենենդեսը՝ նշելով, որ Թուրքիան ավելի շատ լրագրողների ու իրավաբանների է բանտարկել, քան աշխարհի ցանկացած այլ երկիր։
Նշենք, որ Անկարան ցանկանում է ընդլայնել ու արդիականացնել իր F-16 կործանիչները՝ ռուսական S-400 համակարգերի գնման պատճառով ԱՄՆ-ի կողմից հաջորդ սերնդի F-35 կործանիչներ ծրագրից հեռացվելուց հետո։
Մենենդեսը նաև նշել է, որ Թուրքիան ԱՄՆ-ի շահերին հակասող դիրքորոշում է որդեգրել տարածաշրջանում, ներառյալ՝ Լիբիայում։ ՆԱՏՕ-ի դաշնակիցները միմյանց հակասում են նաև Սիրիայի հարցում, քանի որ Թուրքիան թիրախավորում է ԱՄՆ-ի աջակցությունը վայելող քուրդ զինյալներին։
«Դա Թուրքիան չէ, դա Էրդողանն է»,- ասել է սենատոր Մենենդեսը։
Ակնկալվում է, որ Թուրքիային F-16-ի հնարավոր վաճառքի համար կպահանջվի Սենատի հավանությունը, որը Մենենդեսին իրավասություն կտա, որպես հանձնաժողովի նախագահի, խափանելու գործարքը։
Էմմա Չոբանյան
