23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Բեռլինի պատմության թանգարանի ներկայացուցիչներն այցելել էին Հայաստան
Մշակույթ
01.11.2021 | 18:08
Հոկտեմբերի 25-28-ը Հայաստանում էին «Բեռլինի թանգարանների միությանը» պատկանող «Հնագույն և հին ժամանակների պատմության թանգարանի» տնօրեն, պրոֆեսոր Մաթիաս Վեմհոֆը և նույն թանգարանի Ռուսաստանի և Արևելյան Եվրոպայի հետ ծրագրերի համակարգող, դոկտոր Մանֆրեդ Նավրոթը․ տեղեկացնում են ՀՀ ԿԳՄՍՆ-ից։
Այցն իրականացել է Գերմանիայի Դաշնային Հանրապետությունում ՀՀ դեսպանության նախաձեռնությամբ, ՀՀ արտաքին գործերի, ՀՀ կրթության, գիտության, մշակույթի և սպորտի նախարարությունների համագործակցությամբ:
Այցի հիմնական նպատակը 2024 թ. Բեռլինում հայկական մշակույթի ցուցահանդեսի կազմակերպումն էր:
Գերմանացի մասնագետները հանդիպել են Հայաստանի պատմության, Երևանի պատմության, Մայր Աթոռ Սուրբ Էջմիածնի թանգարանների, Մատենադարանի՝ Մ. Մաշտոցի անվան հին ձեռագրերի գիտահետազոտական ինստիտուտի, Էրեբունի պատմահնագիտական արգելոց-թանգարանի տնօրենների և մասնագետների հետ, հանգամանորեն ծանոթացել թանգարանների մշտական և ժամանակավոր ցուցադրություններին, կարծիքներ փոխանակել և քննարկումներ իրականացրել:
Գերմանացի մասնագետներն այցելել են նաև Զվարթնոց, Գառնի, Դվին պատմամշակութային, Մեծամոր պատմահնագիտական արգելոց-թանգարաններ, ինչպես նաև Գեղարդավանք և Երևան քաղաքի Կարմիր բլուր հնավայր:
Այցի ավարտին գերմանացի մասնագետները մեկ անգամ ևս արժևորել են հայկական հարուստ մշակութային ժառանգությունը` նշելով այդ ժառանգության հանրահռչակման և հետագա համագործակցության շարունակականության կարևորությունը:
