Էրդողանը չի մասնակցի Գլազգոյի կլիմայական գագաթնաժողովին՝ ընդունող կողմի հետ արարողակարգային հարցերի շուրջ անհամաձայնության պատճառով

Թուրքիայի նախագահ Ռեջեփ Թայիփ Էրդողանը Հռոմում անցկացված G20-ի գագաթնաժողովի ավարտից հետո վերադարձել է Ստամբուլ․ նա անձամբ չի մասնակցելու Գլազգոյում մեկնարկած կլիմայական փոփոխությունների գագաթնաժողովին։ Թուրքական «Անադոլու» գործակալության փոխանցմամբ՝ նախագահական ինքնաթիռը գիշերը վայրէջք է կատարել Ստամբուլում՝ ուղեկցող ամբողջ պատվիրակության հետ միասին։

Թուրքական լրատվամիջոցների հաղորդմամբ՝ Էրդողանը չեղարկել է ֆորումին մասնակցությունը՝ հյուրընկալող կողմի հետ Շոտլանդիայում իրենց գտնվելու հետ կապված մի շարք արարողակարգային հարցերի շուրջ տարաձայնությունների պատճառով: Կլիմայական ֆորումի բանախոսների թարմացված ցուցակում թուրք առաջնորդի անունը չի հիշատակվում։

Ի սկզբանե նախատեսվում էր, որ Էրդողանը Գլազգոյում հանդիպելու է ԱՄՆ նախագահ Ջո Բայդենի հետ։ Սակայն Սպիտակ տան ղեկավարի հետ բանակցություններն արդեն կայացել են կիրակի՝ Հռոմում։

Այսօր մեկնարկած ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովին (COP26) մասնակցող բարձրաստիճան պաշտոնյաները կիրակի սկսել են հավաքվել Գլազգոյում: ԱՄՆ նախագահ Ջո Բայդենը, Մեծ Բրիտանիայի վարչապետ Բորիս Ջոնսոնը, Ֆրանսիայի նախագահ Էմանուել Մակրոնը, Իտալիայի վարչապետ Մարիո Դրագին և շատ ուրիշներ Հռոմում անցկացված G20-ի գագաթնաժողովից հետո մեկնել են Շոտլանդիա։

Հավելենք, որ ՀՀ նախագահ Արմեն Սարգսյանը նույնպես մեկնել է Միացյալ Թագավորություն՝ մասնակցելու Գլազգոյում կայանալիք ՄԱԿ-ի Կլիմայի փոփոխության մասին շրջանակային կոնվենցիայի կողմերի 26-րդ համաժողովին (COP26):
Գլազգոյի համաժողովը համանախագահելու են Միացյալ Թագավորությունն ու Իտալիան: Քննարկումներին մասնակցելու են պետությունների ղեկավարներ, կլիմայի փոփոխության հարցերով փորձագետներ, գործարար ու քաղաքացիական հանրության առաջնորդներ: Համաժողովը նպատակ ունի մշակել կլիմայի փոփոխության դեմ պայքարի համաձայնեցված գործողությունների ծրագիր։

Տաթև Ֆռանգյան