17.12.2025 | 12:25
ՔՊ վարչության մեծ մասը դեմ է քվեարկել իմ թեկնածությանը. Հայկ Սարգսյան․ ՏԵՍԱՆՅՈՒԹ
Էրդողանը Անկարային քննադատած արևմտյան 10 երկրի դեսպաններին չի հրավիրել Հանրապետության օրվա տոնակատարություններին
Քաղաքականություն
29.10.2021 | 19:13
Թուրքիայի նախագահ Ռեջեփ Թայիփ Էրդողանի աշխատակազմը Հանրապետության օրվա միջոցառումներին չի հրավիրել արևմտյան 10 երկրների դեսպաններին, որոնք քննադատել էին Անկարային իրավապաշտպան Օսման Քավալայի դատավարության կապակցությամբ ու կոչ արել ազատ արձակել։ Այս մասին գրում է ՏԱՍՍ-ը՝ վկայակոչելով Haberturk հեռուստաալիքը։
Տոնական միջոցառումների պաշտոնական մասը տեղի է ունեցել Անկարայի նախագահական պալատում։ Այնտեղ են հրավիրվել քաղաքական գործիչներ, պատգամավորներ, կառավարության անդամներ, բարձրաստիճան պաշտոնյաներ, դիվանագետներ։ Սակայն ԱՄՆ-ի, Գերմանիայի, Դանիայի, Կանադայի, Նիդերլանդների, Նոր Զելանդիայի, Նորվեգիայի, Ֆինլանդիայի, Ֆրանսիայի և Շվեդիայի դեսպանները չեն մասնակցել տոնակատարություններին, քանի որ աշխատակազմը նրանց հրավեր չի ուղարկել։
Նշենք, որ օրերս Թուրքիայի նախագահ Ռեջեփ Թայիփ Էրդողանը հայտարարել էր, որ արևմտյան 10 երկրների դեսպաններին «պերսոնա նոն գրատա» («անցանկալի անձ») հայտարարելու հետ կապված ճգնաժամը լուծված է՝ նրանց վերջին հայտարարությունից հետո։ Դրանով նրանք հայտնում էին, որ մտադիր են հարգել ընդունող պետության օրենքներն ու կանոնակարգերը և չխառնվել այդ երկրին ներքին գործերին։
Իսկ մինչ այդ Էրդողանն ԱԳՆ-ին հանձնարարել էր երկրից վտարել ու «անցանկալի անձ» ճանաչել ԱՄՆ-ի և արևմտյան այլ երկրների դեսպաններին այն բանից հետո, երբ նրանք միասնական հայտարարություն էին տարածել ակտիվիստ Օսման Քավալային ազատ արձակելու կոչով։
Էմմա Չոբանյան
