30.07.2026 | 13:33
Հայաստանի պատանի ինֆորմատիկները Եվրոպական օլիմպիադայում 4 մեդալ են նվաճել
Խոսքի ազատության սահմանափակու՞մ, թե՞ որակյալ լրագրության խթանում․ ի՞նչ խնդիր են լուծում իշխանությունները. ՈւՇԱԴՐՈւԹՅԱՆ ԿԵՆՏՐՈՆՈւՄ
Քաղաքականություն
28.10.2021 | 21:02
Factor TV-ի «Ուշադրության կենտրոնում» հաղորդաշարի հերթական թողարկման թեման զանգվածային լրատվամիջոցների, լրագրողների ազատության ապահովմանը վերաբերող խնդիրներն են։
Անդրադառնալով այսօր խորհրդարանում առաջին ընթերցմամբ ընդունված «Զանգվածային լրատվության մասին» օրենքում փոփոխություններ և լրացումներ կատարելու մասին նախագծին՝ հաղորդման հյուրերից Երևանի մամուի ակումբի ղեկավար Բորիս Նավասարդյանն ասաց՝ երկար ժամանակ պահանջվեց, մինչև հասան կարգավորմանը, որ ըստ փոփոխության՝ չարգելվի «չնույնականացված աղբյուրներից օգտվելը», պարզապես տեղեկատվության բովանդակության պատասխանատվությունը կրի լրատվամիջոցը, որն օգտվում է աղբյուրներից, որոնց հնարավոր չէ բացահայտել։
«Առավոտ» օրաթերթի գլխավոր խմբագիր Արամ Աբրահամյանն էլ համաձայնեց, որ լրատվամիջոցը պետք է պատասխանատու լինի իր տարածած տեղեկատվության համար։ Նրա կարծիքով՝ նախագծի այդ կետի մասին քննարկումներով պատգամավորները պարզապես ժամանակ են վատնում։
ԱԺ Մարդու իրավունքների պաշտպանության և հանրային հարցերի հանձնաժողովի նախագահ, «Պատիվ ունեմ» խմբակցության պատգամավոր Թագուհի Թովմասյանի կարծիքով էլ՝ խնդրահարույց է իրավիճակը նրանով, որ լրագրողական ոլորտի օրենսդրական նախաձեռնությունն իրականացվում է առանց մասնագիտական հանրույթի հետ լայն քննարկումների։
«Երբ նախընտրական ժամանակահատված է, ընտրական կրքերը բուռն են լինում, քաղաքական էմոցիաներն իրենց պիկի վրա են գտնվում, փնտրում են մեղավորեր։ Իսկ ամենախոցելի խավը լրագրողներն են Հայաստանում։ Ով ում չի սիրում, ով ում ինչ չի ուզում՝ ասում է․․․ բոլոր հարցերում մեղադրում են լրագրողներին։ Լրագրողները սխալ գրեցին, լրագրողները սխալ մեկնաբանեցին, անանուն աղբյուրից օգտվեցին, որը սխալ էր և այլն։ Ես այս նախագիծը համարում եմ քաղաքական զայրույթի դրսևորում»,- ասաց նա։
Մանրամասները՝ տեսանյութում։
Հռիփսիմե Հովհաննիսյան
