16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Երեկ ԱԺ-ում Փաշինյանն իր դեմ ցուցմունքներ տվեց. Լիլիթ Գալստյան․ ՏԵՍԱՆՅՈՒԹ
Քաղաքականություն
28.10.2021 | 19:30
ԱԺ-ում երեկ վարչապետ Նիկոլ Փաշինյանը հայտարարեց, որ սեպտեմբերի 25-ին եղել է տեղեկատվություն, որ հնարավոր է առաջիկայում ցանկացած պահի պատերազմ սկսվի: Այդ առնչությամբ հնչում են քննադատություններ, որ հստակ քայլեր պետք է արվեին երկրում, այդ թվում՝ նաև ռազմական առումով, բայց չեն արվել:
Factor.am-ի հետ զրույցում անդրադառնալով այս դիտարկմանը՝ «Հայաստան» խմբակցության պատգամավոր, ՀՅԴ ԳՄ ներկայացուցիչ Լիլիթ Գալստյանը նշեց. «Սեպտեմբերի 25-ից առաջ Անվտանգության խորհրդի նիստում ԳՇ պետը զեկույց է ներկայացրել, և այդ ահազանգերի մասին մեր հանրությունը գիտի: Դրանից առաջ մեր սահմաններին մոտ զորավարժություններ էին իրականացնում և նույնիսկ մեր ողջ հանրությունն էր տագնապի մեջ՝ մոտալուտ պատերազմի սպառնալիքը զգալով: Բայց հասարակությունը պետք է տագնապեր այն օրվանից, երբ որ Նիկոլ Փաշինյանը հայտարարեց, թե ինքը բանակցությունները վարելու է սեփական զրոյական կետից՝ ոչնչացնելով նախորդող ողջ բանակցային գործընթացը: Այն անհավասարակշռությունը և ցայտնոտային վարքագիծը, որով Փաշինյանը ղեկավարում էր Հայաստանը, դրսևորվեց նաև արտաքին քաղաքականության մեջ»:
«Նիկոլ Փաշինյանը երեկ Ազգային ժողովում որոշ առումներով ցուցմունքներ տվեց ինքն իր դեմ: Նա, ըստ էության, միանձնյա որոշումներ է կայացրել»,- ընդգծեց պատգամավորը:- Նախ՝ պատերազմի մասին հնարավոր տեղեկատվությունը որսալուց հետո զորքերը չեն բերվել համապատասխան վիճակի: Տպավորությունն այդպիսին է: Եվ հետագայում Նիկոլ Փաշինյանն է միանձնյա որոշումներ կայացրել, դերակատարում չեն ունեցել այն ինստիտուտները, որոնք պետք է ունենային դերակատարում: Այն, որ Հայաստանը վաղուց Փաշինյանի միանձնյա ղեկավարությամբ է ղեկավարվում, նորություն չէ»:
Գալստյանը հավելեց, որ Փաշինյանը խեղում է ՀՅԴ ԳՄ ներկայացուցիչ Իշխան Սաղաթելյանի հետ զրույցը: Պատգամավորի խոսքով՝ պատերազմի հենց առաջին օրը՝ առավոտյան, Իշխան Սաղաթելյանը հեռախոսազրույցով Փաշինյանին հավաստիացրել է, որ անկախ տարաձայնություններից, ՀՅԴ-ն պետության, հայրենիքի, հայոց բանակի կողքին է: «Եվ մենք դա ապացուցելու կարիք չունենք. մեր կամավորական գումարտակը, մեր վաշտերը պատերազմի 2-րդ, 3-րդ օրն արդեն սահմանին էին»:
Մանրամասները՝ տեսանյութում:
