Քաղաքականություն
26.10.2021 | 22:30
The Times-ը վերլուծել է Տաջիկստանի նախագահ Էմոմալի Ռահմոնի և Աֆղանստանում թալիբների կառավարության հետ հարաբերությունները։
Ըստ պարբերականի՝ Էմոմալի Ռահմոնը, որը երկիրը ղեկավարում է արդեն գրեթե 30 տարի, սովորել է իր երկրում լիակատար հնազանդության։ Նրա իշխանության գալն ուղեկցվել է քաղաքացիական պատերազմով, որի հետևանքով զոհվել է մոտ 150 հազար մարդ, շուրջ մեկ միլիոն մարդ լքել է երկիրը, շատերը փախել են հարևան Աֆղանստան: 30 տարի անց աֆղանները թալիբներից փախչում են հակառակ ուղղությամբ։
Ռահմոնը հայտարարել է, որ չի ճանաչում «Թալիբան»-ի կառավարությունը, քանի որ նրանք չեն կատարել իրենց խոստումը՝ ստեղծել ներառական կառավարություն, որը կարտացոլի Աֆղանստանի ողջ էթնիկ կազմը:
Տաջիկները, այդ թվում՝ 1990-ականներին այնտեղ փախածները, կազմում են Աֆղանստանի ամբողջ բնակչության շուրջ մեկ քառորդը։ Միաժամանակ, սակայն, 33 տղամարդուց բաղկացած թալիբների խորհրդարան են անցել միայն տաջիկների երկու ներկայացուցիչ։
Ըստ Times-ի՝ Ռահմոնին անհանգստացնում է հարևան երկրի կողմից իր շահերի նման բացահայտ անտեսումը։ Թալիբներն իրենց հերթին նախազգուշացրել են Տաջիկստանին՝ Աֆղանստանի ներքին գործերին միջամտության անթույլատրելիության մասին։
Այս հարաբերություններում երրորդ կողմը Ռուսաստանն է, որը մի կողմից Կրեմլում հյուրընկալում է թալիբների պատվիրակությանը, մյուս կողմից՝ Տաջիկստանի հետ համատեղ զորավարժություններ է անցկացնում Աֆղանստանի սահմանին՝ ահաբեկչությանը հակազդելու համար։
Ռուսաստանի հետ համագործակցությունը կարևոր է Ռահմոնի համար, նշում է թերթը։ Մինչև համաճարակը մոտ 1,3 միլիոն տաջիկ (բնակչության մոտ 15%-ը) աշխատում էր Մոսկվայում ու Ռուսաստանի այլ քաղաքներում և տուն ուղարկում տարեկան մոտ 2 միլիարդ եվրո, ինչը համարժեք է երկրի ՀՆԱ-ի մեկ երրորդին։
Տաթև ֆռանգյան
