19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Բաքվում ՌԴ դեսպանը հայտարարել է, որ ռուսական ընկերությունները ցանկանում են մասնակցել Արցախի գրավյալ տարածքների վերականգնմանը
Քաղաքականություն
20.10.2021 | 19:59
Ռուսաստանը հետաքրքրված է Արցախի գրավյալ տարածքների վերականգնման հարցում ռուսական ընկերությունների մասնակցությամբ։ Այս մասին «Սպուտնիկ»-ի ադրբեջանական ծառայության հետ զրույցում ասել է Ադրբեջանում ՌԴ արտակարգ և լիազոր դեսպան Միխայիլ Բոչարնիկովը՝ խոսելով «Rebuild Karabakh 2021» ցուցահանդեսի մասին։
«Ռուսական ընկերությունների մասնակցությունը ցուցահանդեսին շատ կարևոր է։ Այստեղ ներկայացված է ՌԴ տարբեր մասերից տարբեր ընկերությունների լայն սպեկտոր։ Ես, որպես դեսպան, շատ գոհ եմ ցուցահանդեսին ռուսական ընկերությունների այսպիսի լայն մասնակցությունից»,- ասել է դեսպանը։
Նա նշել է, որ ռուսական ընկերությունները կարող են դերակատարում ունենալ Ղարաբաղի վերականգնման գործում։
«Այն, ինչ ես տեսա այս ցուցահանդեսին, լուրջ հույսեր է ներշնչում։ Կարծում եմ՝ այն լուրջ աշխատանքի պարագայում, որն իրականացվում է այժմ Ղարաբաղի վերականգնման համար, ռուսական մասնակցությունը դրանում կարող է նշանակալից լինել՝ հաշվի առնելով ռուսական ընկերությունների փորձը տարբեր շինարարական ոլորտներում։ Մենք շահագրգռված ենք, որ ռուսական ընկերությունները մասնակցեն Ղարաբաղի վերականգնմանը»,- ասել է ՌԴ դեսպանը։
Վերջերս Ադրբեջան ռուսական մեծ բիզնես պատվիրակություն էր այցելել։ Դեսպանը հաղորդել է, որ նման ևս մեկ այց նախատեսվում է նոյեմբերին։
«Ես մեծ հաջողություն եմ մաղթում ցուցահանդեսին, ինչպես նաև ընկերություններին»,- եզրափակել է Միխայիլ Բոչարնիկովը։
Հիշեցնենք, որ ավելի վաղ էլ ՌԴ էներգետիկայի նախարար Նիկոլայ Շուլգինովը հայտնել էր, որ ռուսական ընկերությունները հետաքրքրված են Ադրբեջանի հետ համատեղ հիդրոէլեկտրակայանների ու էներգետիկ այլ օբյեկտների կառուցման, արդիականացման ու վերականգնման նախագծեր իրականացնել Ղարաբաղում։
Էմմա Չոբանյան
