Թուրքիայի խորհրդարան է ներկայացվել Սիրիայում և Իրաքում երկրի ԶՈւ-ի անդրսահմանային գործողությունների իրականացման մանդատը երկարաձգելու մասին օրինագիծը

Չորեքշաբթի Թուրքիայի խորհրդարանի հաստատմանն է ներկայացվել Սիրիայում և Իրաքում երկրի Զինված ուժերի անդրսահմանային գործողությունների իրականացման համար նախագահական մանդատը երկու տարով երկարաձգելու մասին օրինագիծը, գրում է «Անադոլու» գործակալությունը:

Օրինագիծը, որը ստորագրել է նախագահ Ռեջեփ Թայիփ Էրդողանը, ուշադրություն է դարձնում «Թուրքիայի ազգային անվտանգությանը սպառնացող ռիսկերին և սպառնալիքներին՝ կապված Թուրքիային հարավից սահմանակից Սիրիայի և Իրաքի շրջաններում տեղի ունեցող գործընթացների հետ»:

Փաստաթղթում ընդգծվում է, թե «Թուրքիան հատկապես կարևորում է տարածքային ամբողջականությունը, ազգային միասնականությունն ու կայունությունը հարևան Իրաքում: Միևնույն ժամանակ, ՔԱԿ-ի (PKK) և ԻԼԻՊ-ի ահաբեկիչների ներկայությունը մնում է Իրաքի տարածքում, կան էթնիկ անջատողականության դրսևորումներ, ինչն անմիջական սպառնալիք է տարածաշրջանում խաղաղության և կայունության համար, ներառյալ՝ Թուրքիայի անվտանգությանը»:

Այնուհետև փաստաթղթում ուշադրություն է հրավիրվում PKK-ի և YPG-ի սիրիական թևի ստորաբաժանումների և ԻԼԻՊ-ի ահաբեկիչների ներկայությանը թուրք-սիրիական սահմանին հարակից տարածքներում: «Ահաբեկիչները չեն հրաժարվում Թուրքիայի ազգային անվտանգությանը վնաս հասցնելու իրենց փորձերից, սպառնալիք են ներկայացնում երկրի խաղաղ բնակչության համար»,- ասված է փաստաթղթում:

Օրինագծում նաև նշվում է, որ «PKK/PYD-YPG ահաբեկչական կազմակերպությունը շարունակում է Սիրիան պառակտելու փորձերը»:

Տաթև Ֆռանգյան