18.12.2025 | 23:24
ՀՀ տարածքում ավտոճանապարհները հիմնականում անցանելի են
Բաքուն հերքում է Իրանից ՌԴ արտահանման գործընթացը սաբոտաժի ենթարկելու մասին Թեհրանի մեղադրանքները
Քաղաքականություն
19.10.2021 | 16:03
Բաքուն հերքել է նախօրեին իրանական կողմի տարածած տեղեկությունը, որ ադրբեջանական կողմը սաբոտաժի է ենթարկում և խոչընդոտում Իրանից ՌԴ ապրանքների արտահանման գործընթացը։
Ադրբեջանի մաքսային կոմիտեն այսօր հայտնել է, որ արգելափակում եղել է հոկտեմբերի 15-16-ին՝ իրանական կողմում համակարգչային համակարգի՝ 10 ժամով անջատման հետևանքով։ Բացի այդ, բեռնատարները նաև շատ ժամանակ են կորցնում իրանական կողմում ապրանքների բեռնման գործընթացում։ Ըստ Բաքվի՝ ուշացումները կապված են իրանական կողմի խնդիրների հետ։
Ռուս-իրանական առևտրային պալատի տնօրենների խորհրդի անդամ Դենիս Ջալալիֆարն ավելի վաղ հայտնել էր, որ Ադրբեջանը արտահանման խոչընդոտներ է ստեղծում։
«Ռուսաստան մեր արտահանման 80%-ը պարենային և գյուղատնտեսական ապրանքներ են, որոնց մեծ մասն ադրբեջանական Աստարայի սահմանակետից է ուղարկվում։ Այդ ուղղությամբ մենք բախվում ենք սաբոտաժի և Ադրբեջանի իշխանությունների հետ համագործակցության հրաժարման»,- ասել էր Ջալալիֆարը։
Նրա խոսքով՝ ադրբեջանական կողմն ուղղակի չի ասում, որ սահմանը փակ է, սակայն արհեստական խոչընդոտներ է ստեղծում իրանցի գործընկերների համար։
«Ամեն օր նրանք տարբեր պատճառներ են բերում՝ ինչու սահմանը չի աշխատում։ Սկզբում էլեկտրականությունն անջատեցին, այնուհետև ռենտգենի սարքն էր խոտանված, հետո՝ շներ չկային»,- ասել էր նա՝ նշելով, որ այդ պատճառով շատ բեռնատարներ հերթ են կանգնում սահմանին, որն Աստարայում հասնում է մինչև 10 կիլոմետրի։
Էմմա Չոբանյան
