Պուտինը հայտարարել է, որ Հայաստանն ու ՌԴ-ն արդյունավետ համագործակցում են տարբեր ոլորտներում

ՌԴ նախագահ Վլադիմիր Պուտինը ռուս-հայկական ութերորդ միջտարածաշրջանային ֆորումի մասնակիցներին ուղղված ողջույնի խոսքում նշել է, որ երկու երկրների միջև հաստատվել է բովանդակալից երկխոսություն և արդյունավետ համագործակցություն տարբեր ուղղություններով։ Այս մասին հաղորդում է ՌԻԱ Նովոստին:

«Ռուսաստանի և Հայաստանի հարաբերությունները, որոնք հիմնված են բարեկամության և փոխադարձ հարգանքի դարավոր ավանդույթների վրա, իսկապես դաշնակցային բնույթ են կրում: Մեր պետությունների միջև հաստատվել է բովանդակալից քաղաքական երկխոսություն և արդյունավետ համագործակցություն տարբեր ոլորտներում: Միջտարածաշրջանային համագործակցությունն էական դեր է խաղում ռուս-հայկական կապերի զարգացման գործում, ինչը հնարավորություն է տալիս իրականացնել փոխշահավետ ծրագրեր տնտեսական, սոցիալական, ենթակառուցվածքային, հումանիտար և շատ այլ ոլորտներում»,- ասել է Պուտինը:

Նա կարևորել է, որ համաժողովի շրջանակում Հայաստանի և Ռուսաստանի պաշտոնատար անձինք, հասարակական կազմակերպությունները, գիտական, փորձագիտական և գործարար շրջանակները կկարողանան փորձի փոխանակում իրականացնել, քննարկել երկկողմ օրակարգի հարցեր և նախանշել հետագա համատեղ աշխատանքի ուղիները:

«Հուսով եմ, որ համաժողովը կանցնի ստեղծագործական, կառուցողական մթնոլորտում, սկիզբ կդնի նոր նախաձեռնությունների, որոնք կնպաստեն ռուս-հայկական բեղմնավոր գործընկերության ամրապնդմանը, ինչպես նաև եվրասիական տարածքում ինտեգրացիոն գործընթացների խթանմանը»,- հավելել է ՌԴ նախագահը՝ հաջողություն մաղթելով ֆորումի մասնակիցներին:

Տաթև Ֆռանգյան