Ոչ ոք իրավունք չունի հորդորել պատվաստվել կամ չպատվաստվել․ Տիրուհի Նազարեթյան. ՏԵՍԱՆՅՈՒԹ

Հայաստանում խստացվում են COVID-19 համավարակի դեմ պատվաստման պահանջները։ Կառավարության նախաձեռությունն ուղղված է կորոնավիրուսային հիվանդության դեմ պատվաստումների խթանմանը: Աշխատանքի և սոցիալական հարցերի նախարարությունը e-draft.am-ում հանրային քննարկման է ներկայացրել

«Աշխատանքային օրենսգրքում» և «Պետական ծառայության օրենսգրքում» կատարված փոփոխությունների նախագիծը, համաձայն որի՝ պետական համակարգի և մասնավոր հատվածի աշխատողները պարտավոր կլինեն օրենքով տրամադրել պատվաստումը կամ փորձարկումը հաստատող հավաստագրեր: Նոր փոփոխություններով, որոնք պետք է ներկայացվեն խորհրդարանի հաստատմանը, գործատուն իրավունք ունի աշխատանքից ազատել աշխատողին, եթե ավելի քան 30 օր անընդմեջ կամ վերջին 12 ամիսների ընթացքում աշխատողն իր պաշտոնեական պարտականությունները չի կատարել ավելի քան 50 օր:

«Կորոնավիրուսն ու աշխատանքային իրավունքները. պատվաստվե՞լ, թե՞ կորցնել աշխատանքը» թեմայով առցանց քննարկման ժամանակ, անդրադառնալով պատվաստվելու կամ չպատվաստվելու վերաբերյալ պնդումներին՝ «Տեմպուս» սոցիալական իրավունքների պաշտպանության կենտրոնի նախագահ Տիրուհի Նազարեթյանը նշեց. «Ոչ ոք, մանավանդ ոչ մասնագետ, իրավունք չունի կոչեր անել և հորդորել պատվաստվել կամ չպատվաստվել: Քանի որ COVID-19-ը նոր համավարակ է, ամբողջ աշխարհում նոր տիպի մարտահրավեր է և դեղորայքը բավականաչափ փորձարկված չէ՝ օբյեկտիվ պատճառներով, քանի որ ժամկետը կարճ է, ոչ ոք չգիտի, թե իրականում ինչ հետևանքներ են ունենալու պատվաստումները և նաև COVID-19-ը:

Ոչ ոք իրավունք չունի պատասխանատվություն վերցնել և հայտարարություններ անել մի բանի մասին, որի մասին իրականում 100 տոկոսով պատկերացում չկա»,- նշեց Նազարեթյանը:

Նա հավելեց, որ պետք է պահպանվեն քաղաքացիների իրավուքնները. «Մենք ունենք ընտրելու հնարավորություն՝ պատվաստվել կամ թեստավորվել, և սա նորմալ է, պետք է կարողանալ օգտվել ընտրությունից, ոչ թե հայտնվել այնպիսի իրավիճակում, որ ստիպված՝ չուզենալով կամ վախենալով գնալ պատվաստման»:

Մանրամասները՝ տեսանյութում: