27.11.2024 | 13:42
Ռուսական կողմը կրկին ԱԹՍ-ներով հարվածել է Կիևին. վիրավորներ կան
Խաղաղության Նոբելյան մրցանակը շնորհվել է լրագրողների
Քաղաքականություն
08.10.2021 | 19:13
2021 թվականի Խաղաղության Նոբելյան մրցանակը շնորհվել է լրագրողների՝ ռուսական «Նովայա գազետա» թերթի գլխավոր խմբագիր Դմիտրի Մուրատովին և ֆիլիպինյան Rappler հրատարակության հիմնադիր Մարիա Ռեսսային՝ «խոսքի և արտահայտման ազատությունը պաշտպանելու ջանքերի համար», ինչը հիմնարար պայման է ժողովրդավարության և հարատև խաղաղության համար», գրում է BBC-ի ռուսական ծառայությունը:
«Չնայած սպանություններին և սպառնալիքներին՝ «Նովայա գազետա»-ի գլխավոր խմբագիր Դմիտրի Մուրատովը չի հրաժարվել թերթի անկախ քաղաքականությունից: Նա հետևողականորեն պաշտպանում է լրագրողների իրավունքները»,-ասել է Նորվեգիայի Նոբելյան կոմիտեի ղեկավար Բերիտ Ռեյս Անդերսենը:
Նա նաև հիշեցրել է, որ նախօրեին լրացել է լրագրող Աննա Պոլիտկովսկայայի սպանության 15 -րդ տարելիցը։
«Որպես լրագրող և Rappler-ի համահիմնադիր՝ Մարիա Ռեսսան դարձել է խոսքի ազատության անվախ պաշտպան: Rappler-ը քննադատաբար է լուսաբանել Դուտերտեի ռեժիմի սկանդալային և արյունալի հակաթմրանյութային արշավը: Մարիա Ռեսսան օգտվել է ազատ խոսքի հիմնարար իրավունքից, որպեսզի բացահայտի իշխանության չարաշահումը, բռնությունը և աճող ավտորիտարիզմը իր հայրենի երկրում՝ Ֆիլիպիններում»,- կոմիտեի երկրորդ որոշումն է բացատրել Ռեյս Անդերսենը:
Տաթև Ֆռանգյան
