Քաղաքականություն
08.10.2021 | 18:18
Հստակեցված տվյալների համաձայն՝ Վրաստանի Բաթումի քաղաքում փլուզված հինգ հարկանի բնակելի շենքի փլատակների տակ մինչև 15 մարդ կա: Այս մասին հայտնել է դեպքի վայր ժամանած Վրաստանի ՆԳ նախարար Վախթանգ Գոմելաուրին, հաղորդում է «Սպուտնիկ»-ի վրացական ծառայությունը:
«Մեր տեղեկություններով՝ փլատակների տակ 10-15 մարդ կա։ Կապի է դուրս եկել երկու հոգի։ Նրանք ողջ են և խոսում են մեզ հետ հեռախոսով, սակայն չեն կարող բացատրել, թե որտեղ են գտնվում՝ վերևի փլատակների տակ, թե՞ ներքևում»,- ասել է Գոմելաուրին։
Նախարարի խոսքով՝ իրավիճակը շատ ծանր է, սակայն փրկարարներն անում են հնարավոր ամեն բան, որպեսզի ժամանակին մարդկանց դուրս բերեն փլատակների տակից։
«Հարյուրավոր փրկարարներ են ներգրավված։ Իրավիճակն այնպիսին է, որ այնտեղ չեն կարող միաժամանակ 100-200 մարդ աշխատել, մենք նրանց փոխում ենք։ Ներգրավված է նաև տեխնիկա։ Մենք ամեն ինչ անում ենք՝ արագ արդյունքի հասնելու համար, սակայն ֆիզիկապես հնարավոր չէ արագ աշխատել, կարող է վնաս հասցվել։ Մեր փրկարարները պրոֆեսիոնալ կերպով են աշխատում, նրանք մաքրում են ամեն քար առավելագույն զգուշավորությամբ»,- ասել է Գոմելաուրին։
Հիշեցնենք, որ այսօր Բաթումիում փլուզվել է հինգ հարկանի բնակելի շենքի մի մասը։
Տաթև Ֆռանգյան
