27.06.2026 | 20:57
Էդուարդ Սպերցյանը կտեղափոխվի Սաուդյան Արաբիա. աղբյուր
Հիփոթեքին ուղղվող եկամտահարկի վերադարձը կսահմանափակվի․ նախագիծն ընդունվեց առաջին ընթերցմամբ
Տնտեսություն
06.10.2021 | 11:42
ՀՀ ազգային ժողովն առաջին ընթերցմամբ ընդունեց Կառավարության ներկայացրած օրենքի նախագիծը, որով առաջարկվում է հիփոթեքային վարկի տոկոսադրույքը մարելուն ուղղված եկամտային հարկի վերադարձի համակարգը Երևանում աստիճանաբար սահմանափակել, իսկ 2025 թ․-ին հանել:
Մասնավորապես, նախագծով առաջարկվում է սահմանել, որ եկամտային հարկի վերադարձման համակարգը կիրառելի չէ՝ 2022 թվականի հուլիսի 1-ից հետո ստացված վարկերի մասով, եթե գույքը գտնվում է Երևան քաղաքի առաջին գոտում (Կենտրոն և Արաբկիր համայնքներ), 2023 թվականի հունվարի 1-ից հետո ստացված վարկերի մասով, եթե գույքը գտնվում է Երևան քաղաքի երկրորդ գոտում, 2023 թվականի հուլիսի 1-ից հետո ստացված վարկերի մասով, եթե գույքը գտնվում է Երևան քաղաքի երրորդ գոտում, 2025 թվականի հունվարի 1-ից հետո ստացված վարկերի մասով, եթե գույքը գտնվում է Երևան քաղաքի այլ գոտիներում:
Խորհրդարանում ելույթի ժամանակ էկոնոմիկայի փոխնախարար Արման Պողոսյանը պարզաբանեց այդ որոշման պատճառները։ Նրա խոսքով՝ կառուցապատողները ծրագրեր են սկսել գրեթե միայն Երևանում, հնարավորության դեպքում՝ կենտրոնում, մարզերն ամբողջությամբ անտեսվել են։ Օրենքի գործողության ընթացքում Երևանին բաժին է ընկել բնակարանաշինության 93 տոկոսը, մարզերին՝ ընդամենը 7 տոկոսը, այն էլ հիմնականում դրանք մասնավոր տներ են առողջարանային քաղաքներում (Ծաղկաձորում ու Դիլիջանում)։ Այդ իսկ պատճառով որոշում է կայացվել ծրագիրն աստիճանաբար ուղղել մարզեր այս եղանակով։
Հայաստանի Հանրապետության հարկային օրենսգրքում լրացում կատարելու մասին օրենքի նախագիծն ԱԺ նիստում ընդունվեց՝ ստանալով 59 «կողմ», 22 «դեմ» ձայներ:
