Քաղաքականություն
04.10.2021 | 18:12«Փորձեցին խանգարել խորհրդարանի բնականոն աշխատանքներին, բայց տեսան, որ դա իրենց չհաջողվեց: Ինչպես հիշում եք՝ խորհրդարանում՝ «օր ու արև չպետք է տային իշխանություններին»: Հիմա փորձում են վերադառնալ փողոց: Կա նաև երկրորդ նրբությունը՝ երբ որ խորհրդարանում փորձեցին անկարգություններ անել, կոշտ հակահարված ստացան: Հիմա փորձում են փողոցում հայտնվել և թաքնվել իրենց համակիրների մեջքի ետևում»,- այս մասին Factor.am-ի հետ զրույցում նշեց «Քաղաքացիական պայմանագիր» խմբակցության պատգամավոր Հրաչյա Հակոբյանը՝ անդրադառնալով դիտարկմանը, որ այսօր հրավիրված ասուլիսում Ռոբերտ Քոչարյանը վերահաստատեց, որ ընդդիմությունը վերսկսելու է փողոցային պայքարը:
Իշխանական պատգամավորը նշեց, որ ընդդիմությունն այս անգամ էլ հաջողություններ չի ունենա: Նրա խոսքով՝ ընդդիմությունը՝ մասնավորապես Ռոբերտ Քոչարյան անունը ասոցացվում է սպանությունների հետ. «ՀՀ քաղաքացիները հիշում են Քոչարյանի կառավարման 10 տարիները, երբ տեղի է ունեցել Հոկտեմբերի 27-ը, եղել են քաղաքական սպանություններ, Մարտի 1: Քոչարյանը բացի փողից՝ ուրիշ ռեսուրս չունի»:
Քոչարյանն այսօր ասուլիսում անդրադարձել է նաև բանակցային գործընթացին և նշել է. «Երկրի ղեկավարը ոչ թե բանակցությունների սուբյեկտ է, այլ դարձել է օբյեկտ: Չես կարող ծնկների վրա չոքած բանակցել: Չես կարող բանակցել մի մարդու հետ, որը ծաղրում է քեզ»:
Հակոբյանն արձագանքելով այս դիտարկմանը՝ ընդգծեց. «Իրենք օրակարգ հորինեցին, Ադրբեջանի նախագահն օգտվեց այդ օրակարգից, իրենց բառապաշարն է օգտագործում Ալիևը: Դուք էիք Ադրբեջանի նախագահին պաս տալիս տարբեր թեմաներ: Հիմա ի՞նչ ծնկաչոքության մասին է խոսքը: 10 տարի ծնկում էիք, բանակցությանն ասում էիք՝ հողերը կտանք, գալիս այստեղ ասում էիք՝ Բաքվում «չայ» ենք խմելու»:
Հակոբյանը հավելեց, որ ո՛չ Ռ. Քոչարյանը, ո՛չ էլ Ս. Սարգսյանը Արցախի հարց չեն լուծել, միայն պատերազմն են հետաձգել:
«Մենք չէին ուզում ձգեինք, ձգեինք մեզնից հետո եկող իշխանության գրպանը գցեի՞նք, հա՞: Պետք է հարցին լուծում տրվի: Հիմա գործընթաց է գնում»,- նշեց Հակոբյանը՝ հավելելով, որ ցավոտ էր պատերազմի արդյունքը, եղան մարդկային և տարածքային կորուստներ, բայց այլընտրանք չկար:
Մանրամասները՝ տեսանյութում:
