Ադրբեջանը Քարվաճառի հանքավայրերի շահագործման վերաբերյալ պայմանագրեր է կնքել Էրդողանի մերձավորների ընկերությունների հետ

Ադրբեջանը թուրքական «Eti Bakır A.S.» և «Artvin Maden A.S» ընկերությունների հետ պայմանագիր է կնքել Արցախի գրավյալ Քարվաճառի շրջանի հանքավայրերի ուսումնասիրման, հետախուզման, մշակման և շահագործման վերաբերյալ։ Այս մասին հայտնել է Ադրբեջանի էկոնոմիկայի նախարար Միխայիլ Ջաբարովը, գրում են ադրբեջանական լրատվամիջոցները։

««Էլբեյդաշ», «Աղդուզդաղ» և «Գաշգաչայ» հանքավայրերի երկրաբանական հետազոտության և շահագործման համար մենք այդ ոլորտում թուրքական առաջատար «Eti Bakır A.S.» և «Artvin Maden A.S» ընկերությունների հետ համաձայնագրեր ենք կնքել»,- իր ֆեյսբուքյան էջում գրել է Ջաբարովը։

Նա նաև հույս է հայտնել, որ նման քայլը կարևոր դերակատարում կունենա ոչ միայն Արցախի գրավյալ տարածքներում հանքարդյունաբերության գործարկման, հեռանկարային հանքավայրերի ուսումնասիրման և զարգացման հարցում, այլև կարագացնի տարածաշրջանի տնտեսական ինտեգրումը:

Նշենք, որ Ադրբեջանի նախագահ Իլհամ Ալիևը մայիսի 29-ին հրամանագիր էր ստորագրել Արցախի գրավյալ Քարվաճառի շրջանի «Էլբեյդաշ», «Ագդուզդաղ» և «Գաշգաչայ» հանքավայրերի ուսումնասիրման, հետախուզման, մշակման ու շահագործման մասին։ Հրամանագրի համաձայն՝ 30 տարի ժամկետով «Գաշգաչայ» հանքավայրը տրվել էր թուրքական «Eti Bakır A.Ş» ընկերությանը, իսկ «Էլբեյդաշ» ու «Ագդուզդաղ» հանքերը՝ թուրքական «Artvin Maden A.Ş» ընկերությանը։

Թուրքական այս ընկերությունները, որոնց Ադրբեջանը հանձնել է հանքերի շահագործումը, պատկանում են Թուրքիայի նախագահ Ռեջեփ Թայիփ Էրդողանի մերձավոր բիզնես գործընկերներին։ Այս ընկերությունների սեփականատերերի և Թուրքիայի նախագահի հարաբերություններին ավելի վաղ արդեն անդրադարձել ենք։

Էմմա Չոբանյան