ԱՄՆ-ն և Ռուսաստանը Ժնևում կանցկացնեն ռազմավարական բանակցությունների երկրորդ փուլը

Միացյալ Նահանգներն ու Ռուսաստանը հինգշաբթի կանցկացնեն ռազմավարական բանակցությունների երկրորդ փուլը, որի ընթացքում կփորձեն հարթել բազմաթիվ տարաձայնություններ, այդ թվում ՝ միջուկային զենքի և կիբերտարածության վերաբերյալ, գրում է «Ամերիկայի ձայն»-ը։

Պետքարտուղարությունը հայտնում է, որ Ջո Բայդենի վարչակազմի թիվ երկու դիվանագետը ըստ աստիճանակարգի՝ պետքարտուղարի տեղակալ Վենդի Շերմանը, կղեկավարի ամերիկյան պատվիրակությունը Ռուսաստանի հետ ժնևյան բանակցություններում:

Միջգերատեսչական պատվիրակությունների բանակցություններին նախորդել էր հուլիսին կայացած առաջին հանդիպումը, որի ընթացքում էական առաջընթաց չէր գրանցվել:

Դա տեղի է ունեցել այն բանից հետո, երբ նախագահներ Ջո Բայդենը և Վլադիմիր Պուտինը հունիսյան գագաթնաժողովում պայմանավորվել էին վերսկսել բանակցությունները:

Պետքարտուղարությունը հայտարարել է, որ կողմերը մտադիր են մանրամասնորեն և ակտիվ քննարկում ունենալ, որը միտված է հիմք ստեղծելու սպառազինությունների վերահսկման և ռիսկերի նվազեցման հետագա միջոցառումների համար:

Գրառումը այլ մանրամասներ չի փոխանցել, սակայն նշվում է, որ Շերմանը Ժնևից կմեկնի Բեռն, այնուհետև Ուզբեկստան և կավարտի իր ուղևորությունը Հնդկաստան և Պակիստան կատարելիք այցերով:

Հուլիսին կայացած բանակցությունների առաջին փուլից հետո ԱՄՆ -ն հայտարարեց, որ փոխարտգործնախարար Սերգեյ Ռյաբկովի գլխավորությամբ Ռուսաստանի պատվիրակության հետ բանակցությունները «բովանդակային և պրոֆեսիոնալ էին», սակայն չեն հանգեցրել էական արդյունքների, բացառությամբ նոր հանդիպման մասին համաձայնությանը:

Պետքարտուղարության բարձրաստիճան պաշտոնյան, ով ներգրավված էր բանակցություններում, ասաց, որ ԱՄՆ -ը գոհ է մտքերի սկզբնական փոխանակումից և հույս ունի, որ դա կդառնա «կայուն և արդյունավետ երկխոսության» սկիզբ սպառազինությունների վերահսկման և այլ ռազմավարական հարցերի շուրջ:

Նա հայտնել է, որ բանակցությունների օրակարգը չի սահմանափակվում միջուկային զենքի վերահսկման ավանդական հարցերով, այլ անդրադառնում է տիեզերքի և արհեստական բանականության, ինչպես նաև կիբերտարածության օգտագործման հարցերին՝ չնայած վերջին դեպքում քննարկումը կենտրոնանում էր ռազմավարական խնդիրների և միջուկային զենքի, այլ ոչ թե հակերային ակտիվության վրա:

Ըստ աղբյուրի՝ ռուսական կողմը, ինչպես և սպասվում էր, անհանգստություն հայտնեց ամերիկյան հակահրթիռային պաշտպանության համակարգերի վերաբերյալ, և ամերիկյան կողմը պատասխանեց Վաշինգտոնի սովորական փաստարկով, որ այդ համակարգերն ուղղված են ոչ թե Ռուսաստանի, այլ Իրանից և Հյուսիսային Կորեայից բխող սպառնալիքների դեմ: