18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Ֆրանսիայի նախկին նախագահը մեկ տարի ժամկետով ազատազրկման է դատապարտվել
Քաղաքականություն
30.09.2021 | 15:00
Ֆրանսիայի նախկին նախագահ Նիկոլա Սարկոզին այսօր՝ սեպտեմբերի 30-ին դատապարտվել է մեկ տարվա ազատազրկման՝ 2012 թվականի նախընտրական քարոզարշավի ապօրինի ֆինանսավորման գործով: Դատարանի որոշմամբ՝ Սարկոզին պատիժը կկրի տանը, էլեկտրոնային հսկողության ներքո: Այս մասին գրում է DW-ի ռուսական ծառայությունը։
Այսօր ավելի վաղ Փարիզի դատարանը նախկին նախագահին մեղավոր էր ճանաչել միջոցների գիտակցված գերածախսի համար: Սարկոզին դատական նիստին ներկա չի եղել:
Դատարանը եզրակացրել է, որ Նիկոլա Սարկոզին տեղյակ է նախագահական ընտրարշավի համար նախատեսված առավելագույն օրինական ծախսերի մասին, սակայն, չնայած դրան, շարունակել է գումար ծախսել նախընտրական միջոցառումների վրա՝ չնայած գերածախսի վտանգի մասին գրավոր նախազգուշացմանը:
«Լինելով նախագահի թեկնածու՝ Սարկոզին միջոցներ չի ձեռնարկել ծախսերը վերահսկելու համար»,- ասել է դատավոր Կարոլին Վիգիեն՝ նշելով, որ «դա նրա առաջին նախընտրական քարոզարշավը չէր, և նա արդեն փորձ ուներ»:
Դատախազության տվյալներով՝ Նիկոլա Սարկոզին նախընտրական քարոզարշավի վրա ծախսել է թույլատրելի գումարից գրեթե երկու անգամ ավելի՝ առնվազն 42,8 միլիոն եվրո՝ 22,5 միլիոն եվրո թույլատրելիի փոխարեն: Ընդ որում, նա փորձել է ծախսերի գերակատարումը թաքցնել կեղծ հաշվապահության օգնությամբ, որը վարել է Bygmalion ընկերությունը: Ավելի ուշ քաղաքական գործիչն ընկերությանը մեղադրել է իր նախընտրական արշավի հաշվին հարստանալւ համար:
Միայն մարտին Նիկոլա Սարկոզին կոռուպցիայի գործով դատապարտվեց երեք տարվա ազատազրկման, այդ թվում՝ երկու տարվա պայմանական ազատազրկման:
