30.11.2024 | 18:14
Երևանի 4 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Թալիբներն ԱՄՆ-ին մեղադրել են Աֆղանստանի օդային տարածքը խախտելու մեջ
Քաղաքականություն
29.09.2021 | 15:33
Թալիբները հայտարարել են ամերիկյան անօդաչու թռչող սարքերի կողմից Աֆղանստանի օդային տարածքը խախտելու մասին, հաղորդում է ՌԻԱ Նովոստին։
Աֆղանստանի ժամանակավոր կառավարության մշակույթի և տեղեկատվության նախարարի տեղակալ Զաբիուլլա Մուջահիդը Twitter-ում հրապարակած հայտարարությամբ նշել է, որ «երկրի օդային տարածքում ամերիկյան անօդաչու թռչող սարքերի հայտնվելը խախտում է «Աֆղանստանի իսլամական էմիրության» ինքնիշխանությունը»:
«Մենք կոչ ենք անում բոլոր երկրներին, հատկապես՝ ԱՄՆ -ին, գործել փոխադարձ պարտավորությունների համաձայն՝ ցանկացած բացասական հետևանք կանխելու նպատակով»,- ասվում է թալիբների հայտարարության մեջ:
Օգոստոսի սկզբին թալիբներն ակտիվացրեցին հարձակումներն Աֆղանստանի կառավարական ուժերի դեմ, օգոստոսի 15-ին մտան Քաբուլ, իսկ հաջորդ օրը հայտարարեցին, որ պատերազմն ավարտված է: Օգոստոսի վերջին երկու շաբաթներին Քաբուլի օդանավակայանից, որն ամերիկյան զինուժի պաշտպանության ներքո էր, արևմտյան երկրների քաղաքացիների և նրանց հետ համագործակցող աֆղանցիների զանգվածային տարհանում էր իրականացվում:
Օգոստոսի 31-ի գիշերը ամերիկացի զինվորականները հեռացան Քաբուլի օդանավակայանից՝ վերջ դնելով Աֆղանստանում ամերիկյան գրեթե 20-ամյա ռազմական ներկայությանը, իսկ սեպտեմբերի սկզբին թալիբները հրապարակեցին Աֆղանստանի ժամանակավոր կառավարության կազմը՝ Մոհամմադ Հասան Ախունդի գլխավորությամբ, որը «Թալիբան»-ի առաջին կառավարման տարիներին արտաքին գործերի նախարարն էր և 2001 թվականից գտնվում էր ՄԱԿ-ի պատժամիջոցների ներքո:
