Լարվածությունը Պուտին-Էրդողան հանդիպումից առաջ աճում է․ ՌԴ-ն Սիրիայում ուժեղացնում է ավիահարվածները, Թուրքիան՝ լրացուցիչ զորքեր ուղարկում

Թուրքիան շարունակում է լրացուցիչ ուժեր ուղարկել Սիրիայի հյուսիս-արևմտյան հատվածում ապստամբների կողմից հսկվող վերջին անկլավ, քանի որ Ռուսաստանն ուժեղացնում է ավիահարվածները։ Այս մասին Reuters գործակալությանը հայտնել է մի քանի աղբյուր, գրում է Duvar-ը։

Այս ամենը տեղի է ունենում ՌԴ նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի՝ Սոչիում նախանշված հանդիպումից առաջ։
Տեղի բնակիչները, ինչպես նաև ապստամբներն ու ռազմական աղբյուրները հայտնել են, որ ռուսական ինքնաթիռները սեպտեմբերի 26-ին ռմբակոծել են Աֆրինի մոտ գտնվող գյուղերը, որոնք վերահսկվում են թուրքամետ գրոհայինների կողմից։ Աղբյուրները նաև հայտնում են, որ թուրքամետ ուժերից 5 սպանված կա, 12 մարդ վիրավորվել է ռուսական ինքնաթիռների հարվածների հետևանքով։

Ռուսական ռմբակոծությունների արշավը տարածվում է Իդլիբ նահանգի Ջաբալ ալ-Զավյայից մինչև Թուրքիայի սահմանի մոտ գտնվող Աֆրին, արդյունքում ռմբակոծվել են նաև սիրիական բանակի իրանամետ խմբերը։

«Ռուսական էսկալացիան ուժեղացել է այս շաբաթ, սկսվել Իդլիբից ու ձգվում է Հյուսիսային Հալեպ նահանգի սահմանով»,- Reuters-ին ասել է թուրքամետ Ազգային բանակի խոսնակ Յուսուֆ Համուդը։

Թուրքիան իր հերթին վերջին երկու շաբաթների ընթացքում տասնյակ բազաներ է ամրացրել՝ հազարավոր զինվորներով։

«Թուրքական բանակի տեղակայումը մարտական տեսք է ստանում, բոլոր բազաները ուժեղացված են, այնտեղ են գնում շարասյուներ, զրահապատ մեքենաներ, կործանիչներ»,- ասել է Համուդը։

Ռազմական աղբյուրները նաև նշում են, որ գիշերը թուրքական շարասյուները հրթիռների կայաններով ու տանկերով մտել են Սիրիա, դա նկատվել է Ջաբալ ալ-Զավյայի ուղղությամբ, որտեղ տեղակայված են թուրքական բազաները։

Հիշեցնենք, որ սեպտեմբերի 29-ին Թուրքիայի նախագահ Ռեջեփ Թայիփ Էրդողանը մեկնելու է Սոչի՝ ՌԴ նախագահ Վլադիմիր Պուտինի հետ բանակցությունների։ Սպասվում է, որ քննարկման հիմնական թեման լինելու է Սիրիայում տիրող իրավիճակը։ Անդրադարձ կլինի նաև Անդրկովկասում տիրող իրավիճակին։

Էմմա Չոբանյան