19.05.2026 | 10:42
ԱԱ-2026․ Բրազիլի հավաքականի հայտացուցակն ու Նեյմարի վերադարձը
Էրդողանը հայտարարել է, թե չգիտի՝ ինչ է նկատի ունեցել Բայդենը՝ իրեն ավտոկրատ անվանելով
Քաղաքականություն
27.09.2021 | 21:31
Թուրքիայի նախագահ Ռեջեփ Թայիփ Էրդողանը մեկնաբանել է ԱՄՆ նախագահ Ջո Բայդենի՝ իրեն տրված «ավտոկրատ» բնորոշումը՝ ասելով, թե չգիտի՝ ինչ է դա նշանակում։
«Մինչև հիմա ինձ համար անհայտ է մնում պարոն նախագահի «ավտոկրատ» բնորոշումը։ Ես չգիտեմ՝ նա ինչ նկատի ուներ»,- ասել է Էրդողանը ամերիկյան CBS News-ին տված հարցազրույցում՝ պատասխանելով հարցին, թե ինչպես կբնութագրի իր հարաբերությունները Ջո Բայդենի հետ, գրում է «Duvar»-ը։
«Իմ անցյալը քաղաքական անցյալ է, և իմ քաղաքական անցյալում, որը թվագրվում է չորս տասնամյակով, ես միշտ ապավինել եմ ժողովրդավարությանը, այս չորս տասնամյակը նվիրել եմ իմ ժողովրդին ծառայելուն: Այդպիսի առաջնորդ եմ ես, և ահա ինչպես եմ դարձել այն, ինչ այսօր կամ»,- ասել է Էրդողանը։
Նա նշել է, որ վերջին 20 տարում հաղթել է բոլոր ընտրություններում, քանի որ «ժողովուրդն իրենից երբեք չի բողոքում»։
«Ես դարձա նախագահ, և ես դեռ իմ երկրի նախագահն եմ, որը ծառայում է իր ժողովրդին: Սա գործընթաց է, և ես իսկապես չգիտեմ, թե ինչ նկատի ուներ պարոն նախագահը՝ «ավտոկրատ» ասելով»,- հավելել է Թուրքիայի նախագահը:
Էմմա Չոբանյան
