Հասարակություն
21.03.2018 | 20:15«Սասնա ծռեր» խմբի գործով դատական նիստի ավարտին, խմբի անդամները հանդես եկան հայտարարություններով։ Նրանք անդրադարձան «Ժիրայր Սեֆիլյանի և մյուսների» գործով հրապարակված դատավճիռներին, դրանք բնութագրելով՝ հաշվեհարդար։
Վարուժան Ավետիսյանը նշեց, որ պետք է զինվել համբերությամբ և լավատեսությամբ, նա մեջբերեց Ժիրայր Սեֆիլյանի կնոջ խոսքերը․ «Մենք լացող չենք, մենք լացացնող ենք։ Մեր երկիրը զավթած այս ոճրագործ գաղութային ռեժիմի դեմ ուրիշ ոչ մի միջոց չկա, քան զինված ապստամբությունը, կեղծ խաղաղասերներին մի լսեք»։
Մյուս ամբաստանյալ Արմեն Բիլյանը նշեց՝ այս դահլիճում իրենք իրենց են դատում, ոչ թե Սեֆիլյանին: «Շատ շուտով այս նույն դահլիճում շատ ուշագրավ դատեր են լինելու»,- ասաց նա։
Սանկցիայի ժամկետը նոր լրացած և նիստերի դահլիճ վերադարձած Գագիկ Եղիազարյանը ևս իշխանությունների դեմ դուրս գալու կոչ արեց․ «Ազգադավ ռեժիմին պետք է ֆիզիկապես ոչնչացնել»։ Գագիկ Եղիազարյանի նկատմամբ մյուս ամբաստանյալների հայտարարությունների ընթացքում կրկին սանկցիա կիրառվեց, և նա լքեց դահլիճը։
Հայտարարությամբ հանդես եկավ նաև Պավել Մանուկյանը․ «Այս իշխանությունները պատմության մեջ կմնան որպես արգանդակերներ։ Իսկ Ժիրայր Սեֆիլյանի նկատմամբ հաշվեհարդարը, որին ականատես եղանք այս դահլիճում այս չարիքի իշխանության կողմից, ևս մեկ անգամ ապացուցում է, որ դատարանն այս իշխանության ձեռքին գործիք է սեփական ժողովրդին խաղաղ ճանապարհով ցեղասպանելու համար»։
Նշենք, որ նախքան այս ամենը, մեղադրողն ընթերցել էր ՊՊԾ գնդի ներսում արված ձայնագրությունների արձանագրությունները, որոնցից մեկում նշվում էր, որ Պավել Մանուկյանը տալիս է Նիկոլ Փաշինյանի անունը․ «Զուրաբյանին ու Նիկոլին թող քցեն զիբիլի վեդրոն, Նիկոլին շպրտեք զիբիլի վեդրոն։ Եթե Նիկոլը ըտեղ ա, մի հատ քարով գանգին խփեք»,- ըստ դատախազի հրապարակած արձանագրության՝ իր զրուցակցին հեռախոսազրույցում ասել էր Պավել Մանուկյանը։
Նիստի ավարտին, սակայն, Պավել Մանուկյանը, այս հայտարարություններին որևէ կերպ չարձագանքեց։
Մանրամասները՝ տեսանյութում։
Լիլիթ Շաբոյան
