Քաղաքականություն
22.09.2021 | 18:12
Վրաստանի վարչապետ Իրակլի Ղարիբաշվիլին ՄԱԿ-ի Գլխավոր վեհաժողովի շրջանակում հանդիպել է Թուրքիայի նախագահ Ռեջեփ Թայիփ Էրդողանի հետ։ Հանդիպումն անցել է ինչպես դեմ առ դեմ, այնպես էլ ընդլայնված ձևաչափով։ Այս մասին տեղեկանում ենք Վրաստանի կառավարության կայքում հրապարակված հաղորդագրությունից։
Նշվում է, որ հանդիպման ընթացքում կողմերը քննարկել են տարածաշրջանային զարգացումները։ Ղարիբաշվիլին նշել է, որ Վրաստանի նպատակը տարածաշրջանում խաղաղության ու կայունության ապահովումն է, և որ իր երկիրը հավատարիմ է իրականացնել խաղաղարարություն՝ Կովկասյան տարածաշրջանում երկարատև խաղաղության ու կայունության համար։
Զրույցի ընթացքում կողմերը քննարկել են նաև Վրաստանի վարչապետի միջնորդությամբ Հայաստանի ու Ադրբեջանի միջև ձեռք բերված համաձայնությունը, որի արդյունքում ազատ արձակվեցին հայ գերիներ, Ադրբեջանին էլ փոխանցվեցին ականապատ դաշտերի քարտեզներ։ Կողմերը նաև ընդգծել են, որ այս համաձայնությունը հիանալի հիմք է հարևանների միջև հետագա համագործակցության համար։
Ղարիբաշվիլին և Էրդողանը քննարկել են նաև երկու երկրների հարաբերություններին վերաբերող տարբեր հարցեր։
Էմմա Չոբանյան
