11.10.2026 | 11:22
Երևանի 4 վարչական շրջաններում և Արարատի մարզի գյուղերում մինչև 36 ժամ ջուր չի լինի
Էրդողանն ու Գուտերեշը Նյու Յորքում ՄԱԿ-ի կենտրոնակայանի դիմաց բացել են 35 հարկանի «Թուրքական տան» շենքը․ ԼՈՒՍԱՆԿԱՐՆԵՐ
Քաղաքականություն
21.09.2021 | 16:10
Թուրքիայի նախագահ Ռեջեփ Թայիփ Էրդողանը Նյու Յորքում մասնակցել է «Թուրքական տան» (Türkevi) բացման արարողությանը։ «Անադոլու»-ի փոխանցմամբ՝ միջոցառմանը մասնակցել է նաև ՄԱԿ-ի գլխավոր քարտուղար Անտոնիո Գուտերեշը։
«Մենք հպարտ ենք, որ Նյու Յորքի ուրվագծին ավելացնում ենք մեր պատմական ու ավանդական ճարտարապետության անթերի օրինակը։ Թուրքիան ստեղծել է գլուխգործոց, որն արտացոլում է նրա մեծությունն ու աճող հզորությունը»,-հայտարարել է Էրդողանը։
Նրա խոսքով՝ Türkevi-ն դառնալու է համաշխարհային հարթակում Թուրքիայի տեղի արտացոլանքը՝ «Հանրապետության 100-ամյակին ընդառաջ», որը նշվելու է 2023 թվականին։
Թուրքիայի նախագահը նաև համոզմունք է հայտնել, որ կենտրոնը տասնամյակների ընթացքում ծառայելու է որպես Թուրքիայի դիվանագիտական հաջողությունների մնայուն խորհրդանիշ։
ՄԱԿ-ի գլխավոր քարտուղարն իր հերթին «խորը գոհունակություն» է հայտնել Նյու Յորքում «Թուրքական տան» բացմանը ներկա գտնվելու կապակցությամբ: Նա նաև «անկեղծ երախտագիտություն» է հայտնել Թուրքիային՝ «փախստականների հարցում աջակցության համար»։
Թուրքական տան 35 հարկանի շենքը գտնվում է Նյու Յորքում ՄԱԿ-ի կենտրոնակայանի դիմաց։
Շենքը 1977 թվականին ձեռք է բերվել ամերիկյան IBM ՏՏ հսկայից՝ այն ժամանակ Թուրքիայի ԱԳ նախարար Իհսան Սաբրի Չաղլայանգիլի ջանքերով։ Մինչև 2013 թվականը շենքում տեղակայված են եղել ՄԱԿ-ում Թուրքիայի մշտական ներկայացուցչությունն ու Նյու Յորքում գլխավոր հյուպատոսությունը։
Էմմա Չոբանյան
