18.12.2025 | 14:30
Եթե վարչապետը մեղադրում է՝ ԿԳԲ գործակալ են, պահանջում եմ փաստ ներկայացնել, թե չէ սուտ մատնություն է․ Դավիթ Անանյան․ ՏԵՍԱՆՅՈՒԹ
Էրդողանը փորձում է ազդել Գերմանիայում ընտրությունների արդյունքների վրա․ DW-ն ներկայացնում է թուրքական սխեման
Քաղաքականություն
20.09.2021 | 15:43
Թուրքիայի իշխող «Արդարություն ու զարգացում» կուսակցությունը ձգտում է շեղել թուրքական ծագմամբ գերմանացի ընտրողներին Գերմանիայում իրենց «ենթադրյալ թշնամիներին» ընտրելուց և ուղղորդում քվեարկել փոքր կուսակցությունների օգտին, որոնք նշանակալի աջակցություն չունեն։ Գերմանիայի հիմնական քաղաքական կուսակցությունները կազմված են գործիչներից, որոնց Թուրքիայի նախագահ Ռեջեփ Թայիփ Էրդողանն ու իշխող կուսակցությունը համարում են իրենց թշնամիները։ Այս մասին գրում է Deutsche Welle-ի խմբագիր Էլլմաս Թոփչուն։
Ըստ նրա՝ Գերմանիայում սպասվող ընտրություններին ընդառաջ, թուրք-գերմանական համացանցային ֆորումներում, սոցիալական ցանցերում խորհուրդներ են տարածվում քվեարկության վերաբերյալ։ Դրանցից շատերում պարզապես կոչ են անում բոյկոտել ընտրությունները, ոմանք էլ տեսակետ են տարածում, որ չպետք է քվեարկել Քրիստոնեադեմոկրատական ու Քրիստոնեասոցիալական կուսակցությունների օգտին՝ իսլամի նկատմամբ նրանց քաղաքականության պատճառով։ Գերմանացի-թուրք ընտրողներին խորհուրդ է տրվում նաև չքվեարկել Սոցիալդեմոկրատական կուսակցության օգտին, քանի որ նրանք համակրում են թուրքական ընդդիմությանը, գյուլենականներին։ Անցանկալիների ցանկում են հայտնվել նաև «Կանաչների» և «Ձախերի» կուսակցությունները։
Նման տեսակետներ էին արտահայտվել նաև 2017թ-ի դաշնային ընտրություններից առաջ։ Այն ժամանակ Էրդողանն անձամբ էր կոչ արել չքվեարկել վերոնշյալ կուսակցությունների օգտին՝ ասելով, որ նրանք Թուրքիայի թշնամիներն են։ Այդ ժամանակ Թուրքիայում իշխող «Արդարություն ու զարգացում» կուսակցության համակիրները ձևավորել էին «Գերմանացի դեմոկրատների դաշինքը»։ Այժմ թուրքական ծագմամբ որևէ քաղաքական ուժ չի մասնակցում ընտրություններին, սակայն Թուրքիայի իշխող կուսակցության լոբբին փորձում է միջամտել դրանց։
Նրանց թիրախը հիմնականում Թոդենհոֆերի թիմն է՝ «Արդարություն կուսակցությունը», որը ստեղծել է Քրիստոնեդեմոկրատական կուսակցության նախկին անդամ Յուրգեն Թոդենհոֆերը։ 80-ամյա գործչին աջակցում են թուրքական արմատներով շատ երիտասարդներ։ Թուրքիայի պետական TRT հեռուստաալիքը, պարբերաբար անդրադառնալով Գերմանայի դաշնային ընտրություններին, միայն Թոդենհոֆերի թիմին է ներկայացնում դրական լույսի ներքո։
Բացի այդ, Թոդենհոֆերը գտել է բավականին ազդեցիկ աջակցի՝ թուրքական ծագմամբ գերմանացի հայտնի ֆուտբոլիստ Մեսութ Օզիլին։ Այդուհանդերձ, փորձագետները նշում են, որ բոլորը գիտեն՝ Թոդենհոֆերը իրական հնարավորություն չունի ընտրություններում։ Սակայն, ըստ հոդվածագրի, թուրքական իշխող կուսակցության լոբբին տարիներ շարունակ փորձում է փոքր կուսակցությունների միջոցով ազդեցության երկարաժամկետ ռազմավարություն կենսագործել, իսկ ներկա ընտրություններում հիմնական նպատակը «Թուրքիայի թշնամիների»՝ հատկապես «Կանաչների» ու «Ձախերի» ընտրությունը կանխելն է։
Էմմա Չոբանյան
