16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Քաբուլի միջազգային օդանավակայանն այսօր պաշտոնապես բացված է հայտարարվել
Քաղաքականություն
20.09.2021 | 12:42
Աֆղանստանի մայրաքաղաք Քաբուլի միջազգային օդանավակայանն այսօր պաշտոնապես բացված է հայտարարվել ներքին ու միջազգային չվերթների համար։ Այս մասին հայտնում է աֆղանական Khaama Press –ը՝ հղում կատարելով երկրի քաղաքացիական ավիացիայի վարչությանը։
Քաբուլի օդանավակայանում գրանցված քաոսի և օգոստոսի 26 -ի ահաբեկչության հետևանքով թռիչքուղին ու տերմինալները մեծապես վնասված էին: Օդանավակայանում աշխատանքի վերսկսման հարցում օգնել են Քաթարից ու Թուրքիայից մասնագետները։ Սեպտեմբերի 4-ին Քաբուլից իրականացվել է առաջին ներքին չվերթները։
Սեպտեմբերի 9-ին ԱՄՆ Զինված ուժերի դուրսբերումից հետո առաջին ինքնաթիռը Քաբուլից Դոհա միջազգային թռիչք է կատարել, իսկ սեպտեմբերի 13-ին Թալիբանի իշխանության գալուց ի վեր առաջին օդանավը Իսլամաբադից վայրէջք է կատարել Քաբուլում։
Հիշեցնենք՝ սեպտեմբերի 7-ին Աֆղանստանում իշխանությունը զավթած «Թալիբանը» հայտարարեց նոր կառավարության կազմը: Մոլլա Մոհամմադ Հասան Ախունդը նշանակվեց վարչապետ, իսկ նրա տեղակալներ՝ շարժման քաղաքական թևի առաջնորդ մոլլա Աբդուլ Ղանի Բարադարը և շարժման քաղաքական թևի ղեկավարի տեղակալ մոլլա Աբդուլ Սալամ Հանաֆին: Թալիբների խոսնակը միաժամանակ նշել է, որ կաբինետի այս կազմը ժամանակավոր է:
Տաթև Ֆռանգյան
